為了實現媽媽遺願，我成為了女兒國唐僧: 944

喺場上我望一望返上去，兩位師妹向我投射出十月芥菜嘅感謝眼神，都幾微妙下，祝你哋三位好運…處理完一件事之後，終於可以專心收服個傻仔。
嘿嘿，我野獸般嘅鬥性要甦醒喇。
我打咗個眼色畀左衛，佢應該唔知我想點，亦無諗過要理我；同樣都係中四嘅佢就梗係想黐埋瘟神踢掉低我喺後面啦，有幾多個踢波嘅鍾意留喺後面死截爛掃㗎，不過你即管去啦，為咗阿健隻手，我一定…
今次嘅攻勢又無功而回，對面嘅後衛一個長傳穿過左衛同瘟神中間將個波送到嚟傻仔健嘅控制範圍，我當然係即刻衝上去啦，當佢一接一踩控定個波，考慮緊同我纏鬥定係快傳畀無乜威脅嘅中鋒之時…唔到你諗，因為我隻腳已經嚟到！
我一改同佢對峙嘅作風，諗都唔諗就直接飛鏟埋去！咁我係鏟波唔係鏟人嘅，整傷自己個朋友都唔係咁好吖，難得有個草場，我當然要測試下瞓身飛鏟嘅爽快。
喺高度反應嘅正式賽事，呢啲蠻力搶波只需要一下換腳或者挑起一跳就可以輕輕帶過化解，不過呢啲賽事咯…
當阿健一踩定個波嘅時候，就已經比我隻腳一嘢㧻返去後面，連帶左腳都俾我踢開咗差啲失平衡，就算睇唔到都知佢而家表情一定呆晒！但…我背脊都好痛，乜鬼垃圾假草嚟！
球證見到我咁準確㧻走個波無吹到！而個波隨之嚟到左衛嘅腳下，唔忿氣嘅阿健當然轉身追返上去，左衛可以選擇自己死帶，傳畀有人mark實嘅瘟神或者搏一鋪直傳去左翼卸責等前場死鬥…不過唔需要。
我：「有！有呀！」
我已經跑到返去差唔多中圈嘅位置，而對面個中鋒重好似個傻仔咁喺我身後等運到…可能啱啱個眼色奏效，左衛聽聲望都唔使望就批咗個波嚟我腳下，我即時搵到個空位撞牆前傳去對面鬆懈咗嘅右翼位置。




一嘢就將個波送到去威脅位置，右翼當然機不可失一跳心口控定就繼續帶波，但係…今次我選擇繼續跑！
我：「有！有呀！」
有乜？我都唔知，純粹㞗跑攪亂檔，拜託唔好咁快傳畀我，我無乜信心咁遠跑嚟過埋後衛再射入…
但正因為我嘅舉動引起咗對家左衛嘅注意，右翼搵到空檔連推兩下一嘢勁射，方向同速度都好唔錯！
不過始終係窄角度抽射，對面龍門一早就扎好馬應對，由於球速太勁，龍門選擇咗用雙臂撞走，好死唔死個波彈咗嚟我嘅方向度！於是我再跑多兩步，計準預判位置，向後掹起右腳，準備大力…
當然對面啲人係識郁嘅，龍門同左衛已經企咗喺我面前，加埋身後我睇唔到本來mark緊瘟神嗰個都衝緊埋嚟！
於是我祭出射爛人牆嘅決心！
等到個波埋嚟撞到我左腳，再即刻煞停右腳，用腳踭位唧起個波去我左手面…食粥食飯就睇你喇，隊長！