為了實現媽媽遺願，我成為了女兒國唐僧: 943

瘟：「嘩，佢啲出品真係幾有質素㗎喎。」
我：「重有三張多，你留嚟自己打飛機啦。」
瘟：「我係咪要簽名同寫句嘢咁？」
係人都知啦，不過佢隻手就停咗喺度唔識郁；啱啱重做緊劇烈嘅體力運動，突然之間要用腦係唔適應㗎喇。
瘟：「到底…寫啲乜先好？」
我：「學校的社長需要妳，點擊我那裡展開激情對話。」我用隻手㧻佢幅相入面嘅雞雞位置。
瘟：「認真呀！咪玩啦…」
我：「澳門首家線上賭場上線啦…」
瘟：「重玩！打你㗎！換你出場！」
唓，你估我好想踢咩，一開始又係你迫我嚟幫手。




我：「Queenie妳都敢溝，使乜我教呀，自己寫啦。」
瘟：「點同喎，呢啲係三唔識七嘅妹妹仔。」
睇嚟佢同我相反，我係對住啲三唔識七嘅先敢亂講嘢。
我：「不如就咁咁咁，再咁咁咁，然後咁咁咁。」
瘟：「哦，我係咪要留contact，留乜比較好？」
我：「梗係電話啦，你唔係諗住留IG等人fol咁串嘴呀？」
瘟：「但係電話…叫佢打嚟？唔係好怪咩…」
我：「妖，你真係唔識㗎喎，你學嗰啲網上廣告咁，喺自己個電話隔籬畫返啲你有用開嘅message app icon，咁人哋咪識搵你囉，你都唔驚妹妹仔打嚟性騷擾你㗎啦。」
最後嘅結果就係：『妳好呀！聽聞有女仔想嚟識我，一時之間唔知點好添。多謝妳嚟睇我踢波，如果想搵我嘅話…下面呢個就係我嘅contact喇，唔使怕醜㗎，因為我都好怕醜，一齊啦～』最後就係佢嘅簽名加日期。
唉，我都唔知好唔好，講真我自己都未試過正正式式去識一個女仔，次次唔知點解身邊就會出現女，玩下玩下就會…有啲出事咁嘅feel；瘟神作為一個學生領袖加讀書人，寫啲字亦工整企理，我諗女仔睇到會開心嘅。




佢踎喺度抄抄抄，最花時間嘅就係畫icon。
瘟：「好，搞掂！之後嘅就交畀你喇。」
啲隊員喺度休息，我就忙到甩轆兼爆廠，都唔理得在場啲人會唔會留意我嘅古古怪怪，飲完兩啖水之後我就跑咗去低form堆嗰邊搵人。
個過程我希望爽手啲，唔想啲女神懷疑我，亦唔想瘟神睇到我將兩張相交畀邊個，發現目標後我專登兜個圈上去再擒返落嚟，穿過啲受驚嘅師弟妹坐咗喺兩個目標後面。
我：「兩位師妹，送啲禮物畀妳哋，唔使多謝我。」我將手伸向前插入佢兩個嘅身體之間…喂！唔準諗衰嘢，呢個係事實嚟。
佢哋認得我，再望一望我手中嘅東西，就一人一張攞咗去，然後我又極速跑返落場，因為下半場要開始喇，唔得閒理嗰兩個妹會唔會為咗爭閃卡款而大打出手。