為了實現媽媽遺願，我成為了女兒國唐僧: 931

QQ當然彈琴，YY亦都係小提琴，Zilvia吹一枝銀色的…長笛掛，其他人我無興趣…原來無Uranus份四缺一，又係嘅，U字頭運動咁好，再玩埋樂器就真係不得了。
我…唔可以自卑，至少我同兩個女神嘴嘴過…
喺音樂Miss嘅指揮下，校歌徐徐響起，實在老套到核爆；而我就全神貫注咁望住右女神彈琴，都有留意下YY嘅，始終琴日發生咗咁多事，好難無感情…
為咗我老細作者喵嘅畜身安全，只簡單羅列一下合奏曲目，某不知名輕鬆交響曲，無盡惡夢之綠袖子，明日復明日老套何其多嘅明天會更好，稍有睇頭之港女最愛let it go…質素就…過得去咁啦，同團長佢哋比又真係差啲嘅。
但可以睇住自己心愛嘅人表演心情係唔同啲嘅，喂！剩係QQ咋，無YY呀！我…唔可以咁㗎，打過茄輪咋嘛…
然後台上嘅人散一散水，剩返三位女神。
佢哋對望一下，由YY拉響小提琴，又係Lydia，Zilvia負責吹vocal，原本嘅結他伴奏變成QQ嘅鋼琴，整體氛圍由pop rock變咗做清新抒情，可能由於佢哋三個真係好friend，出嚟嘅效果好過頭先大合奏好多。
佢哋表演完之後，換嚟一個師兄吹色士風，兩隻嘢落返嚟見到無乜位，越行越後，YY見到我就索性直接行過嚟；一般嚟講，我喺學校唔會同班女神走得太埋，只係同班嘅先會覺得我同佢哋熟，但而家我同YY都咁咯，佢加唔加把口串我都已經再無分別。
而QQ，留咗喺台上面幫位師兄伴奏。
Z：「其實師兄吹嘅right here waiting都唔錯吖。」




Y：「普普通通啦，我覺得嘥咗Queenie嘅鋼琴。」
唉，妳用團長嘅水準嚟比邊有得比吖…
Z：「無辦法啦，成間學校得佢識吹。」
Y：「人哋都畢業咯，下年應該連色士風都無埋；點呀，死仔包，眼甘甘望住人哋係咪呷醋啫？」佢用手肘撞我。
我：「關乜事喎，我聽同學演奏音樂咋嘛。」
呢個時候Zilvia先尷尬咁望一望我點頭，睇到佢咁嘅樣就會令人好想保護佢，好驚佢俾男仔蝦。
Y：「好彩你個女神同人哋差三年咋，如果唔係佢實出手，話晒都夾咗十粒八粒鐘。」
我：「唓，關我乜事，女神多人追係正常。」
Y：「咦，妳做乜有咁大包曲奇嘅？整塊嚟吖。」
佢無等我答佢就攞咗上手，解開條鐵線，揀咗塊白色嘅果仁曲奇放入口；咁我…無乜所謂嘅，雖然呢包或者可以稱呼為愛心曲奇，但咁多塊我都總會有得食，唔係直接送畀人或者掉咗佢就得啦；我望一望入面啲曲奇都幾正常，只係有啲崩咗或者唔夠圓。




Y：「Zilvia食唔食呀？都幾好味。」
Z：「唔喇，無得（口浪）口會好辛苦。」
感覺上Zilvia先至係比較有貴氣嘅女神，雖然好靜。
我：「話時話禮堂唔俾人食嘢㗎喎。」