thriXt Qantasy 純文字安眠之作 (New: - U2K - 一直上架): 930

本來都無乜嘢，QQ講完YY又講，攪到我自己都鬼死咁唔自在，好在佢頭先都無乜嘢，我幾驚佢突然抱住我表白…
上到去禮堂門口，有兩個師姐用張先生枱set咗個檔攤喺度買格仔餅同雞蛋仔，隔籬重放好咗一包二包曲奇喺度，美其名當係才藝表演嘅一部份，實質就係為學會撈營運資金，燈油火蠟連鋪租都唔使，咁都要賣廿蚊底？就連曲奇都要廿蚊六塊，我唔好出返去麪包鋪買？不過如果有人想要學生妹出品嘅話，呢啲機會就實在係難能可貴嘅…如果係我鍾意嘅師姐手製，二百蚊都抵啦。
「嚟吖，阿爽幫襯下啦，新鮮出爐熱辣辣㗎！」明明我喺學校咁含蓄，點解會有兩個我唔識嘅師姐嗌得出我個名嘅，而我睄到佢哋眼角望住我隻手喺度偷笑。
我：「乜…今日禮堂准食嘢咩？」
「唔得㗎，你可以過嗰邊平台cafe食。」
我：「咁麻煩，唔好喇，我要入去睇嘢。」啱晒，因為我完全無諗過要幫襯，純粹八下。
「喂，做乜你包曲奇入面會有咁多塊㗎？」
我：「哦…去批發商買平啲吖嘛，有機會再嚟搵妳哋。」
然後我又企喺門口昅下先，有個低form嘅男仔喺度朗誦…
「呢位同學入嚟坐啦，陣間會奏校歌，到時會閂一閂門。」一位疑似學生會兼prefect嘅人類同我講。




入到去，觀眾比我想像中嘅人多，我諗有成三四百人，前面已經無晒位，又唔見有熟人，如果我坐到離行離迾嘅話都幾肉酸，於是我去咗中後排重有人坐嘅位置，行到去中間望一望個師弟，然後坐咗喺佢隔籬。
我：「係呢？咁多人嘅，你哋好鍾意睇表演？」
「乜呀，今日派成績表，派完先生叫我哋嚟坐下先好走人。」佢個樣好似唔多高興。
我：「乜重會點名咩，而家閃人都無人知啦。」
「會唔會唔係咁好…同埋都返咗嚟。」原來係乖仔。
以前嘅我梗係走得就走，去打棋又好，搵Carmen姐姐又好，點會得閒坐喺度如坐針氈。
「呢位同學，你梗係中三㗎嘞。」前面一個師兄講…
我：「係呀…點解你會知？」我唔係咁出名呀？
「剩係你哋先前日派成績表咋嘛，夾埋DSE放榜，我哋中四五重要補課添，有兩班重上緊堂。」
原來DSE放咗榜…唔知架車佢考成點呢？佢成績一直都唔差，但喺佢間學校又唔可以作準，如果我搵佢淨係為咗八佢成績又好似唔係太好，我諗順其自然遲啲會知嘅。




亦唔怪得琴日Alfonso同Helen定過抬油，一定搞掂晒。
朗誦完之後，一堆人喺上面搬搬抬抬set凳set架，隨之而來嘅重有部鋼琴，跟住我見到QQ，YY，Zilvia，重有其他音樂組嘅人上台。