thriXt Qantasy 純文字安眠之作 (New: - U2K - 一直上架): 927

Q：「我知你…各方面都有需要，唔希望你因為介意我而死忍，所以先會同你講如果有女仔可以發展嘅話就去開始，想有地方…滿足嘅話，我就會配合，希望大家都可以過得開開心心，而唔係搞到你要好似出去偷食咁…今日咬你嘅女仔…係邊個嚟，你EX？」
我：「唔係佢哋，佢哋點會咁衰喎。」
Q：「你又激嬲咗韻婷？」
我：「唔關佢事…係啲無關痛癢嘅女仔嚟…我係出去同女仔玩，不過我無做啲乜嘢，一直都好守規矩，我諗佢咬我都只係玩下嘅啫，至於發展…我睇唔到可能性住，如果真係發生嘅話，到時我會誠實同妳講。」
Q：「睇嚟你係唔打算講…啱嘅，其實我都無必要知，而且講過唔會干涉你嘅生活，只係，請你唔好講大話，無必要作故仔畀我聽，我唔係傻妹，唔好測試我嘅智慧，希望你好好記住…如果你覺得有啲嘢唔想俾我知，想要私人空間，你直接話唔方便講就得，我無興趣做你肚入面條蟲。」QQ…我點會唔想講妳知，我想劏埋個肺出嚟畀妳睇添呀，雖然我而家已經唔再恨YY，係有啲驚佢啫。
我同YY，就好似地下關係中嘅地下關係…
我：「知道，唔會再有下次。」
Q：「其實我都係擔心你出面識埋啲唔知乜嘢人，陣間闖禍點算喎，又或者激嬲其他女仔，傷害咗佢哋都唔好吖，你喺學校已經有個普通朋友要處理㗎喇。」
QQ，我只想要妳呢個唯一嘅普通朋友。
我：「我會戴眼識人…同埋我想講，就算韻婷對我有好感，應該都無嘢嘅，佢當我朋友嚟嘅啫，我又無畀暗示佢，唔會咁亂嚟嘅…」




Q：「有無聽過愛情係會沖昏頭腦？」
我：「唔好嚇我啦，我無心理準備㗎。」
Q：「你真係好笑，呢啲嘢都要心理準備？年中都有幾個男仔同我表白㗎啦，定係因為你對佢都有啲意思呀？如果佢殺到埋身就好好考慮下，想同人哋發展嘅話…但係如果你敢玩弄感情嘅話，我會代全天下女人手刃你。」
我：「唔考慮，我享受單身生活…」虧我日日同妳住埋一齊重講得出句咁嘅嘢，妳唔使指擬踢我畀其他女人。
我：「又話唔干涉我生活，但又管住我唔俾我曳。」
Q：「點呀！而家係咪唔滿意呀？快啲去沖涼啦。」
我：「妳唔沖先？咁夜妳都眼瞓啦。」
Q：「唔想對住你個花面貓呀，污糟邋遢。」
我：「但係妳嘅大髀都俾我整到污糟咗…」
Q：「你聽日重要踢波㗎！即刻同我入去！」




唓，點解屋企會好似多咗個阿媽咁㗎，明明我只係想要個女神妹妹，哎吔！好痛…原來QQ真係好狠，佢咬傷咗我啲表皮有血水流緊出嚟，媽咪啊…
好唔容易終於沖完個涼，感受到女人嘅暴力來自佢哋嘅愛，出返去就聽到啲好優美嘅音樂。