為了實現媽媽遺願，我成為了女兒國唐僧: 921

Y：「唓，其實如果QQ同我求救，我點會唔幫佢，我諗其他姐妹都一定會接濟佢。」
我：「佢就係唔想咁，佢有佢嘅堅持，我都係配合佢，如果妳想幫佢就唔好同佢去啲太貴嘅地方。」
Y：「無囉，又唔迫佢，佢自己都不知玩得幾開心。」
我：「我會…努力負責㗎喇，三餐溫飽唔成問題，佢自己都有好努力諗辦法。」
Y：「硬頸富貴女，佢嘅辦法就係食窮你呢隻水魚。」
QQ識搵錢㗎喇…當然我唔會講佢知。
我：「唔食都窮啦，如果搞唔掂…我會企喺課室門口…出面條走廊，拉客等妳問價㗎喇，賺返嚟嘅肉金先至真係我嘅錢，要乜附加服務隨便講，無套打真軍都得。」
Y：「發夢啦你，想收錢屌我，你以為自己好掂呀？」
我：「我…知錯，收皮，或者妳去搵奧丁囉。」
Y：「先唔制呀，一陣我沉船就真係飯都唔使食！」




睇嚟，佢真係女權主義者嚟，唔介意使錢玩仔…
Y：「算，慳返，多謝你，我多一千蚊自己使。」
我：「一千蚊…對妳嚟講都唔係錢嚟㗎啦，但就夠我買三十幾盒燒臘飯喇。」
Y：「嗱，我屋企有啲錢，唔代表我好浪費。」
我：「唔浪費，係應使得使，食好嘅，著好嘅。」
Y：「喂，你唔好以為好過癮，搵得多就使得多，好多時買衫食嘢係為咗應酬，水電費管理費都唔少，揸車又要油費隧道費，重要交稅呢，你估唔使煩？你知唔知你一個人霸晒成間公屋有幾幸福，重要收埋個女神喺屋企。」
我：「係，我細路仔唔識世界，不知人間疾苦。」
Y：「同埋…上面呢期唔掂吖嘛，啲水喉收晒水喇，我哋做跨境生意嘅好大鑊，個amount隨時得返個零頭。」
我：「吓，無事嘛？雖然我間唔中都聽到新聞講，以為從來唔關自己事…」
Y：「梗係唔關你事，但全港打工仔MPF都唔見咗三四成錢喇，我屋企人取態就比較穩健，可以頂得住嘅，哈，如果我屋企仆街，我第一時間就嚟搵你求救，同Queenie兩個食到你皮包骨。」




我：「唔好呀，我…搞唔掂㗎。」
Y：「鹹濕仔，你晚晚三P就真係搞唔掂嘞，不過我屋企重有個麻煩…就係我個仆街呀哥。」
我：「佢做錯啲乜搞到要俾阿妹咁樣話…」
Y：「你見到佢買啲衫褲鞋襪重唔明？」
我：「咁佢出身喺呢啲屋企，使多少少錢買下嘢都正常嘅，但其他嘢唔會太差呀…」
Y：「好話嘞，佢？個個月買嘢食嘢課金打機溝女使成萬銀，讀書讀到一坺嘢勉強掹車邊入到浸大讀乞食科，GPA連三都無，今年年頭佢…重要攪大咗個中學女仔，我哋屋企賠咗十幾萬湯藥費畀人哋先平息咗件事。」