為了實現媽媽遺願，我成為了女兒國唐僧: 890

信，我信妳係黐線，但我更加唔信我自己。
如果我有奧丁咁型我一早伸咗隻手入妳條褲入面啦，重點會驚妳當我玩具咁玩。
不過既然有條女喺隔籬，無理由…呀呀吖吖！
Y：「仆街！做乜無端端轉過嚟？！」
無錯，我愚蠢嘅動作令到張浮床反咗。
唔知點解，俾佢鬧反而覺得比較自在。
我：「異性相吸嘛，妳咁靚女。」
Y：「口甜舌滑，都唔知係咪真嘅。」
我：「肯俾男朋友惜嘅咪靚女囉。」
我喺水入面抱實咗佢，惜完塊面又惜佢嘴仔，佢亦都好乖咁攬返住我，估唔到佢水性咁好，可以有個咁嘅女朋友…其實係會好開心，又可以喺水底非禮佢，但我始終唔敢掂佢啲太敏感嘅部位。




我：「想問下個妝會唔會溶㗎？」
Y：「防水嘅，應該無事掛，不過是但啦。」
我：「不如我哋拖住手游水咯？」
Y：「可以呀。」女朋友識游水真係好，唔使特別照顧佢，左右打橫排又得，上下抱住佢條腰又得，而我都無再諗要點非禮佢，就好似一對拍咗好耐拖嘅情侶咁輕輕鬆鬆喺個海入面玩，之後我哋攞咗兩個潛鏡玩下，當然唔期望香港嘅水底有啲乜，但都有啲魚嘅，最開心其實係可以喺水底入面睇到佢，佢亦都會自然咁拖我，撓我手，攬我腰，或者用腳纏住我…我諗對佢嚟講同男仔相處嘅各種舉動已經一早入晒血，所以第一次就可以咁惡攪我，今朝又除我條褲同我嗰度玩…
QQ…都應該差唔多？我記得佢一早已經講過Kuromi係識游水嘅，唔知呢個暑假有無機會呢？
之後我哋又同其他人一齊玩，直至黃昏。
上返船，我見到團長同Helen喺度整緊嘢食，穌哥示範點樣五餅二魚咁一次過燒十塊肉，Helen就揸住三枝燒烤叉上面拮滿丸，重要一人一杯酒。
我：「嘩，有無咁肚餓，而家先嚟燒？」
A：「唔係呀，啲嘢食雪唔返㗎嘛，快快脆脆整熟晒佢畀佢哋搦返屋企做餸，無謂嘥啦。」
呢度嘅人應該都唔會志在嗰一千幾百，頭先Charles揞咗二千蚊出嚟畀YY嗰下都面無難色，又估唔到佢哋咁識飲水思源，態度分分鐘好過啲屋邨阿叔，其實我真係好憎人食剩一大堆嘢，因為會處理死我，除咗炸魷魚鬚呢啲，乾乾爽爽我會攞入廚房偷食咗佢。




我：「咁使唔使我幫手呀？重有咁多嘢食剩。」
H：「唔使喇，你過去陪Yvonne啦。」
我：「咁我幫手食緊條腸啦。」總覺得，佢兩個係怕我阻住佢哋謦密欬，其實又有乜所謂呢？本身都唔識俾我八掛下唔使死啫。