為了實現媽媽遺願，我成為了女兒國唐僧: 889

游完出嚟又要返去，Charles爬咗上條香蕉船上面趴咗喺度，估計公主又會畀說話佢聽；團長攞咗塊board出嚟同勾咗個扶手喺架水上電單車嘅尾，奧丁就即刻企咗喺上面滑水；我同Gabriel游返埋去，到咗中間就見到YY同Queenie各自趴咗喺一張浮床上面，我哋就爬上去搵返自己條女。
由於Gabriel非常大份，Queenie用盡九牛二虎之力先平衡到俾佢扯到個人上去，非常之搞笑。
Y：「又贏咗嘞，開心啦。」
我：「OK啦，又唔係公平嘅比賽嚟。」
Y：「呢個世界，從來都係無公平過。」
我：「我知吖，唔使同我講。」
Y：「你已經玩勻晒呢度啲女咁滯，重想點？」
我無覆佢，本身又唔係諗住嚟玩女嘅，況且呢度無一條女我玩得起，妳只係玩緊我嘅弱小心靈。
太陽已經無咁曬，我大字形咁攤喺度享受紫外光嘅洗禮，意圖擺脫現實世界嘅諸多紛擾。
Y：「要你陪我玩下啫，使唔使散晒咁。」


我：「大佬，返工都有得break啦，俾我抖下。」
本身我係瞇埋眼嘅，然後漸漸有個黑影過咗嚟我頭頂上面，將啲熾熱嘅紅外線擋住。
我：「…」我望住佢塊面好似UFO咁降落嚟，直至到鼻哥掂鼻哥，而佢一直望實我對眼；我從來都未見過啲氣勢咁凌人嘅女仔，就算以前卡車同我日日打得火熱都未至於咁。
Y：「喂，交叉仔。」聽到女仔咁嗌我就會腳軟。
我：「係，係，我喺度。」
Y：「我愛你呀。」呢句說話確實係有毒。
我：「YY…我都愛妳。」然後我抱住佢條腰。
佢淑女惜咗我一啖，都唔知佢想點，然後捉住我個身迫我打側望住佢；講真嗰句，今日嘅佢係幾靚嘅，比起平時返學嘅佢執多咗少少，稍微畫咗一下眼線令到個輪廓更加分明，嘴唇亦都搽咗啲水潤亮麗嘅gloss，不過我早就俾QQ嘅整色整水搞到麻目咗。
同埋唔明佢做乜死都唔除走條短褲，係咪想營造一個男朋友唔想佢俾人睇蝕嘅感覺？實在有啲大嘥，明明連公主小姐都咁開放。
Y：「拍拖唔係應該好開心嘅咩？」


我：「啱嘅，應該要。」
我惜返佢一啖，再輕輕撫摸佢條腰，逐吋逐吋向上移，直至用手指細細力㧻佢露出嚟嘅波肉。
我：「好想拉開塊布睇下。」我手指沿住橙色嘅布邊喺度移動，一路感受佢嫩滑嘅肌膚。
Y：「可以㗎，只要你唔驚激嬲女朋友嘅話。」
都唔知佢邊句真邊句假，十足十踩地雷咁。
我：「先唔制，得罪妳嘅話以後有排我受。」
Y：「做乜咁唔相信自己嘅女朋友呢？」