為了實現媽媽遺願，我成為了女兒國唐僧: 882

絲：「咁你話畀我聽除咗我之外最鍾意邊個女仔先？」正所謂夫唱婦隨，佢點會唔玩埋一份。
「咁就Cherry啦…」喺靚女姐姐威迫利誘下…
乖乖女Cherry即刻面紅，打咗個男仔手臂一下，但係又忍唔住佢內心嗰種欣喜嘅笑容，其實啲男仔對邊個有意思，又點會瞞得過呢兩隻老人精嘅法眼喎；但佢哋真係好青澀呀！唉，明明我同QQ只係大佢哋啲咁多，點解會變成咁，我都想體驗下呢啲害羞死人嘅心情，而唔係歡送QQ出去送外賣，到佢返嚟就問佢有無戴套…但正因為咁，佢可以好大方咁畀好多嘢我，實在一言難盡。
男仔嘅花心，一般嚟講係燕瘦環肥都鍾意；而我，既想繼續同QQ一路曖昧，又想同韻婷重新體驗多一次乜都唔識初戀嘅感覺，又想同姐姐玩性愛遊戲，又想同細蚊享受回憶入面嘅風情，甚至想調戲人哋嘅公主女朋友；我，實在係不知所謂。
然後，我哋成堆人上到去最高嘅甲板。
絲：「嗱，我跳一次㗎咋，係咁兜返上嚟會好攰！」我完全唔覺得你兩個有資格講呢啲嘢。
A：「嚟啦，開cam影緊喇，跳水王后。」
本來，我以為佢都係隨便跳下，點知佢竟然要褪後助跑，縱身一躍，騰空抱膝，轉體兩周半再打開直插入水…What the…呢堆人真係好犀利，個個都文武全才咁，實在係覺得自己企喺度相形見絀，自慚形穢。
丁：「吖，衰妹做乜咁認真，咁落力嘅？」
A：「到你喇，落埋去搵女朋友啦！」




「嚟啦！靚仔奧丁哥哥！」小迷妹講。
Y：「快啲落去啦，無咗女朋友保護驚你俾班女溶咗呀！」同一個道理唔知可唔可以應用落公主度呢？或者我可以略盡綿力收返佢保護費。
丁：「唉，真係無你哋符。」
同佢女朋友一樣，褪後助跑，接前手翻，騰空曲體，轉體一周打開直插入水，稀鬆平常。
「Gabriel哥哥，你可唔可以都表演下呀？」
G：「跳落去好容易，但我唔會做到任何動作。」
睇嚟無返咁上下，都唔好喺度做哥哥姐姐。
「不如你同Queenie姐姐一齊跳落去吖。」
「如果抱住跳落去一定好浪漫！」
「係呀係呀！好似Titanic咁！」




G：「係咪…真係要entertain佢哋？」
Q’：「如果你攬得我夠實都可以嘅。」
H：「得唔得㗎，如果整親受傷點算？」
整親…有護士姐姐，可以瞓落佢大髀，享受一流嘅醫療服務，然後俾佢鬧某地方血壓不正常急升。
G：「無咁易嘅，點睇都安全過龍舟掛鼓。」