為了實現媽媽遺願，我成為了女兒國唐僧: 881

丁：「喂！你輸咗喎，要答我一條問題！」
「咪答咗你囉！我鍾意隔籬位個女仔。」
丁：「我唔要聽你啲垃圾答案，我係問你呢架船上面最鍾意邊個女仔？」呢啲膠game，真係玩多一個世紀都唔會厭。
「邊有得咁㗎，你頭先夠答係蜜絲姐姐。」
丁：「咁好正常呀，一啲問題都無。」
「咁我真係鍾意隔籬位個女仔嘛！」明顯係藉口…
丁：「暑假喇！重隔乜籬位，快啲喺呢度揀一個。」少年你太年輕，千祈唔好同啲無恥之徒玩埋呢啲嘢，點你都係輸。
「你夠唔夠膽答除咗蜜絲姐姐最鍾意邊個吖？」
丁：「哦，咁咋，就梗係Helen媽啦，有邊個女仔好似佢咁有愛心，對小朋友咁溫柔喎。」
H：「走呀，你唔係小朋友喇，嘔心！我冰清玉潔唔使你鍾意呀！」好似有弦外之音…




奧丁輕易就化解咗個攻勢，搵個單身姐姐無賴下就搞掂，呢招可謂四兩撥千斤。
丁：「好，到你喇，等我估下，應該係乖乖女Cherry。」呢個玩星睇怕玩到無嘢好玩，Cherry聽到佢咁講就變到紅粉緋緋，而少年就好似偷嘢俾人捉到咁，講真…男仔咁花心答邊個都得啦。
H：「喂呀，玩還玩，你唔好教壞啲細嘅得唔得呀，唔使驚，一係你搵我做擋箭牌啦。」
「我…我鍾意蜜絲姐姐！佢身材又好，運動又勁，靚女得嚟性格又好，我鍾意佢。」少年發揮傲氣，不甘就範，以子之矛攻子之盾。
丁：「性格良好？何以見得，你肯定？」
「係你對佢唔好先咁講咋嘛，你都唔係真係惜蜜絲姐姐嘅！」嘩…不過佢哋相處係難明嘅。
丁：「哈，你都斗膽喇，即係要同我爭女咁話啦，有無諗過，身邊有個自己打唔贏嘅女仔係一件好恐怖嘅事？」
「係你對唔住佢，唔聽話先俾佢打咋，抵死呀！」
絲：「講得好，我哋唔好理啲衰人，見你咁欣賞我，就等姐姐教你點樣變大個仔啦。」蜜絲好大方，用手一嘢繞住個細嘅，盡情咁情佢食波邊餅，咁當然同我哋頭先罰game有一大段距離啦。
H：「喂呀！你兩隻嘢咪再飲喇，趕你哋落海㗎！」




Helen姐姐身為呢度嘅大家姐，發起惡上嚟都唔講得笑，如果唔係啲家長點會放心畀個細路佢照住…
「蜜絲姐姐，我想睇妳跳水呀！」食緊波餅嘅講。
「係呀！唔想剩係睇妳IG表演。」
「嚟啦，難得出到嚟海中心。」