thriXt Qantasy 純文字安眠之作 (New: - U2K - 一直上架): 854

論易食梗係打白板叫一四萬，蜜絲點睇都係清一色，Queenie似棄糊或者雜色，公主唔肯定對對糊定混對，按道理白板出銃都未必好大鑊，但萬子清一色加正花已經八番底…
但如果我食一四萬就得混一色紅中，呢種感覺同扣牌博唔使輸差唔多，但就算扣我都係得三隻東可以打，呢種樣衰呢…
Y：「信自己啦。」佢喺後面攬住我，用個心口頂住我背脊，呢個舉動竟然令我頭腦清晰咗。
我：「三萬！」全場靜咗一靜，我都如坐針氈。
絲：「三萬嘛…上。」佢諗咗一陣，攞咗。
Q’：「都係嗰句，九章包清自摸。」
我：「如果天要亡我…妳慢慢裸泳啦，吖吖嘩！」
我摸摸YY個頭講，點知佢咬咗落我膊頭上面。
P：「咁緊張關頭，你兩個重有心情玩嘅？」
我：「青春嘛，就係要任性，放蕩，不羈。」




我講完之後Gabriel同Queenie忍住無噗哧一聲笑出嚟，其實…我都唔係好柒啫。
冷靜，冷靜，再冷靜，大三元幾番嘅呢？
我：「兩萬，食啦！出銃輸少截！」
Q’：「乜話？！你拆二三萬嚟打？」
鬼叫我摸到隻發咩，呢啲嘢邊到我揀。
我：「欸，都無乜邊隻牌係打得嘅，是但啦，輸嗰個又唔係我…唔！唔好！唔敢！」
女魔頭已經用佢棚牙夾住我嘅耳仔。
我：「咁佢上完三萬，斷估唔會食二萬掛，其實我都唔係好識打。」然而我知道五萬係絕不能打。
絲：「唔要呀，過主啦，咪阻我攞牌。」
其實已經得返兩巡牌要攞…而我係單吊白板，枱面有一隻，但其實呢個moment無人會敢打，亦有可能有人揸住兩隻做眼或者等碰；可以肯定，我食得出嘅機會係微乎其微。




Q’：「九索。」姐姐特別冷靜，而公主呆望。
P：「我…等等，我諗一諗…」
C：「咪碰啦，碰完重有乜牌打呀，妳唔係諗住而家叫糊得返一隻牌摸食得出呀？」
絲：「吖，而家啲旁觀者真係好清晰嘅啫。」
Q’：「又唔好咁講，呢場係隊制賽嚟㗎嘛，咪隨便討論囉，反正唔會對我哋有損失。」
P：「咁我摸牌喇…」佢摸完打返隻九索出嚟。
公主都棄，如果我再摸萬子都唔知點算…點算…點算…隻牌乜都無嘅？！係白板呀！
我：「自摸！小三元！混一色！對對糊！」
我已經興奮到唔得閒留意佢哋乜神情，同一時間我條…女朋友騎咗上我大髀上面嘴我，嘴對嘴嗰隻，重要啜下啜下，係差在未伸埋條脷入嚟，不過我就唔敢主動塞條脷入去喇…嗯，有女真好。
絲：「玩夠未呀！計數啦，再惜當你食詐糊㗎。」