為了實現媽媽遺願，我成為了女兒國唐僧: 842

就係咁，我哋繼續喺度飲飽食醉，幾杯落肚之後，YY變得更加熱情同紅粉緋緋，係咁箍住我隻手揩落佢對波上面，無乜嘢嘅，佢今日作為我條女都正常…而我哋幾pair就坐得更加埋喺度謦欬，題材就…八掛下Gabriel佢哋喺學校點夾band再質疑下有無喺band房入面共赴巫山，問下奧丁嗰pair究竟每個禮拜進行幾多戶外戶動，小公主份人好似有啲內斂，Charles就專登伸手箍實佢條腰…又講下團長嘅壞話；團長就同Helen喺個bar枱度謦欬，感覺上佢哋兩個非常老朋友，但又睇唔出有啲乜曖昧關係，可能…或者變到類似我同卡車咁，見面都唔會再係著重嗰啲嘢。
「Hey！我老竇嗦茄！」班大帝終於玩到餓。
好彩我都趁空檔炒埋最後一碟嘢，包括我早就等緊嘅咖喱魷魚，牛油粟米炒雜菇，干燒開邊蝦，蒜蓉全熟蠔…唔知點解人哋嚟燒嘢食，我就好似嚟煮嘢食咁。
「穌哥，唔該要杯vodka加whisky加rum！」
A：「自己跳落海飲鹽水啦。」
「Helen媽，有無燒定啲嘢食畀我哋呀？」
H：「叫團長分啲五餅二魚畀你，唔好問我。」
「喂！咪攪我啲嘢食呀！」
「嚟啦，Kristy，分啲口水尾畀我，遲啲聽妳話。」
「走呀！黐線！咪攪我呀…」




佢哋成日出嚟玩，點會唔識溝仔溝女吖…
如果唔係團長同Helen媽睇住佢哋，分分鐘變成sex party都有份。
「嚟，玩鋪廿一點先，邊個輸咗負責燒嘢食！」
其實我都想陪佢哋一齊嘈生晒，傻下傻下癡癡呆呆最快樂，順手即場溝下妹妹仔，不過我今日係人哋嘅男朋友。
丁：「上面有自動麻雀機，玩唔玩呀？」
睇住班細嘅打啤打到喪晒，我哋又無理由join嘅，時間嚟到中午個太陽噴火咁唔玩得水住，手痕都好正常。
Q’：「唔衛生先打，唔浪費時間。」
丁：「OK吖，就我哋四個？」
Q’：「咁樣會變咗對家團體賽㗎喎，咪打bridge咁…Yvonne妳識打牌㗎可？」
因為頭先顧住服侍YY，我重食緊嘢唔得閒插嘴住，反正今日乜都係佢話事。




Y：「呵，妳問我呢個職業女賭徒呀？」
絲：「咁Charles你玩唔玩呀？」
C：「可以呀…點解唔得。」睇佢個款就唔係玩開。
G：「咁我攞埋啲嘢飲上去先。」