為了實現媽媽遺願，我成為了女兒國唐僧: 835

Y：「呀！非禮呀！我要反擊！」
扮到咁可愛，有邊個估到佢威脅我嗰陣咁恐怖。
Q’：「無得妳反擊呀！去反擊我條仔啦，佢重大過我，嚟啦，Xavier幫我哋影相吖。」
Y：「喂呀，唔好啦，唔出得街㗎…」
Q’：「唔出得咪啱囉，我哋自己keep咋嘛。」
嗱…唔關我事呀，妳哋姐妹情深點玩我都管唔到，高YY半個頭嘅Queenie攝咗喺YY後面，雙手穿過佢胳肋底放喺bikini上面，個頭就晾喺佢膊頭。
Q’：「再嚟多張正經嘅！」佢又彈返上前。
嗯…睇嚟YY喺呢個樂團都玩得幾開心。
Q’：「喂！兩位男士過埋嚟陪我哋影！Cherry幫我哋揸機吖！」然後各遞咗部電話畀佢。
原來呢個係Cherry…算吧啦，記嚟托咩！




兩位靚女繼續企中間，我同Gabriel就喺兩邊搭住佢哋膊頭；如果可以，成日咁樣，一齊拍拖去玩都幾好；假如無QQ，我諗我會厚住面皮認命話做佢長期ptbf算，最多乜都俾佢話晒事，我會聽聽話話。
我可以同個咁嘅女仔拍拖，已經越咗唔知幾多級…
然後乖乖嘅Cherry幫我哋影咗幾幅相。
「Yvonne姐姐妳今日好靚呀。」
嘩！傻豬嚟嘅，Queenie重喺隔籬㗎，妳咁大聲讚YY唔讚佢，唔驚大姐姐嬲咗呀…
Y：「呀，多謝呀，但我平時都係咁啫。」
妖，虛偽女魔頭扮謙，擺明就心中暗爽啦。
「點同喎，平時又唔係咁著，真係羨慕莎菲亞哥哥，可以有個咁靚嘅女朋友。」
Y：「做乜羨慕呢個傻瓜，第時到妳拍拖，妳男朋友咪一樣有個咁靚嘅女朋友。」
我得承認，佢同QQ嘅中文oral能力都係超卓。




「有排啦，媽咪話我一定要入到U先准識男朋友。」好正確！佢都係為妳好唔想妳搞到好似啲女神咁不知所謂。
Y：「妳係咪真係會聽媽咪話先？到妳俾男仔追嗰陣就…唔好諗咁多啦，食嘢先！」
自從識咗QQ之後，我就覺得平民嘅聚餐係…見到食物，開飯喇！食呀！食呀！而佢哋嘅食物就只係輔助佢哋social嘅道具嚟。
Y：「莎菲亞，點啫，我靚唔靚呀？」
其實我比較鍾意交叉仔呢個朵，雖然我知道係上唔到大枱，但叫到我好似歷史人物咁實在唔慣。
我：「靚呀，超級靚，勁爆靚，就同平時一樣。」
我原汁原味咁還返呢句畀佢。