thriXt Qantasy 純文字安眠之作 (New: - U2K - 一直上架): 828

A：「呀，乜你真係有咁鍾意管弦樂？」
C：「唔係，慣咗放喺個袋入面跟身啫。」
A：「咁不如…你都揀返首歌嚟玩下？」
C：「都唔夾，咪攪我。」
嗯…睇落呢個富貴子弟又係難服侍嘅一個。
A：「咁多位團友，等我身為團長都講兩句先…」
「吓…穌哥你已經講咗好多句㗎喇。」
A：「嗱，今次係認真嘅…我哋呢個管弦樂團有大有細，有人已經玩到升U，亦有人啱啱嚟咗無耐，我知道各人嘅諗法都唔同，有人俾父母迫玩音樂，有人係為咗揀學校加分，有人係覺得好型想學嚟溝仔溝女，有人真心鍾意音樂…無所謂嘅，我只係想大家喺呢度可以真正覺得音樂係好玩嘅，而喺玩嘅過程你得到嘅嘢係會跟你一世，絕對唔會考完試就唔記得，明唔明白？」
「明白！」
A：「好！咁就自由活動啦！呢度啲玩具可以隨便試，唔好整爛就得。」




「Helen媽！妳可唔可以教我玩呀？」
H：「我邊識喎…呢啲太少線…」
「奧丁哥哥，我可唔可以點首rock版帝女花？」
丁：「得，你咪點嚟自己表演囉。」
「唔要！我要張國榮嘅大熱。」
「No呀，講夾band就梗係要彈beyond㗎啦。」
講真，佢哋嘅品味係唔同普通嘅初中生。
Y：「喂，男朋友。」越聽越不能自拔。
我：「做…做乜嘢呀？YY…」
Y：「咪顧住睇小朋友啦，你自己又唔識玩。」




我：「明明我都係一個小朋友嚟。」
Y：「搵鬼信呀，神高神大，馬會都未必截你啦…」
死靚妹，有口話人無口話自己，妳咪又係一個扮大個幫男朋友衰十一嘅衰女包。
Y：「上去幫下手啦，Gabriel已經上咗去，唔使你出錢就去做下嘢。」
嗯，幫手？幫乜？係喎，應該要準備食物…我太沉醉喺飾演佢條仔，完全無諗過其他嘢。
於是乎我就上去先，反正唔識音樂嘅我喺度都唔會有作為，上到去果然見到Gabriel開咗個保溫箱排緊啲食物出嚟，於是我又擸咗一箱打開，攞入面啲嘢食出嚟。
雞翼，豬扒，牛扒，羊架，比目魚，大蝦，生蠔…嚟吖，再豪啲吖，我就唔信你哋會有龍蝦鮑魚象拔蚌！結果，我為咗真係無而有啲失望。咁擺枱呢家嘢從來就係小弟嘅強項，話晒都係酒樓train咗差唔多半年，見到啲食物已經好似行programme咁知道要放邊，例如啲菇呀，粟米呀，就要擺入啲，肉就放中間，腸仔丸呢啲易搞嘅就放最開。
咦，我身份唔應該咁熟手㗎喎，睇嚟要放慢返啲手腳…雖然加百列哥哥呢個人應該唔會諗啲乜；咦，咖喱水魷？究竟邊個咁有品味呀？你哋都真係幾特別…