thriXt Qantasy 純文字安眠之作 (New: - U2K - 一直上架): 825

唔知，聽日QQ佢哋嘅talent show又會有啲乜嘢演出呢，我竟然開始有所期待。
到咗尾段，聽得出團長加咗更加多嘅effect去包圍住前面嘅三人，甚至乎用啲轉咗key嘅音符同和弦撞落去Gabriel啲音符上面，呢種反差令到樂曲動態提升咗一整個層次而又唔會令人覺得突兀…YY講得無錯，就算我唔識音樂都知呢個人係癲嘅。
其實睇樣都知啦！
而我，從來無想象過管弦樂團可以玩到咁。
A：「嘩，犀利…Priscilla妹妹妳好唱得喎。」
P：「團長大人過奬，只係我咁啱有玩choir啫，嘻嘻。」呢位公主真係好難形容…
A：「妳啲日文都好流利喎。」
P：「啱啱考咗N3，而相川七瀨又係我鍾意嘅歌手。」佢嘅笑容…而Charles佢就有啲面燶。
A：「哎，可惜管弦樂團好少需要女主音…今日呢度啲女士實在係非常才華橫溢，Yvonne妳又使唔使出嚟玩下咁呀？」
Y：「唔好意思呀，出面呢啲我玩唔掂…」




A：「唔怕喎，妳都係玩開線嘅。」
Y：「咪玩我啦，多咗兩條線點玩喎。」
A：「咪玩我啦，bass明明一樣都係四條線。」
Y：「對唔住，我知錯，小妹數學太差。」
吓，咁嘅大話妳都講得出？明明次次同QQ內鬥…
A：「好啦，咁呢個得喇掛？」團長佢又攞多個盒出嚟，我開始覺得佢玩埋魔術都無問題，而盒入面嘅係…半個小提琴？中空小提琴？
Y：「真係吖…係都唔俾我抖下嘅。」
A：「乖啦，好多小朋友想睇妳哋姐妹對決㗎。」
Q’：「咁你係咪應該要買多個電子中提琴呢？」
A：「再買我破產㗎喇，同埋咁多提琴會好悶。」




G：「咁我唔搶fo喇，等睇妳哋內鬨…」
YY接過枝嘢，隨手拉咗幾嘢，好似係古典音樂嚟，個感覺有啲似QQ彈嘅星球大戰進行曲。
唔掂，YY拉小提琴個樣真係好型，同佢平時閪口閪面個樣完全判若兩人，而且呢首樂曲實在係太有氣勢，就好似同人講佢唔係玩下咁簡單。
A：「夠…夠喇，邊有人提琴獨奏新世界4th movment㗎…重要用晒四條弦…」
（喵按：Antonín Dvořák，Symphony No. 9 New World Symphony，IV. Allegro con fuoco）
Y：「唔試下點知你啲玩具好唔好玩喎。」
A：「俾我抖下…今日唔想聽到classical，妳揀返首同Queenie jam啦。」
YY㩒咗幾下：『F.I.R. Lydia』
A：「妳都幾識玩喎，咁樣恰姐姐都有嘅。」
Y：「你話我知有邊首嘢係violin同bass一半半？」




A：「欸…得…我會安排，咁妳哋唱唔唱㗎？」
Y：「我習慣用violin嚟唱歌。」
Q’：「咁我都唔同佢vocal撞聲。」
A：「你諗住vocal同melody一手包辦？」
Y：「如果可以嘅話…」