為了實現媽媽遺願，我成為了女兒國唐僧: 824

打咗咁多年機，我當然知呢首係日文歌，發夢見到少女，重唔係綺夢嚟，首歌咁鹹濕嘅？
Y：「不願再做發夢的少女…嘩，乜咁激呀…」
我：「YY，㗎文妳都曉㗎？」
Y：「唔係，呢首嘢好出名，有研究開音樂嘅多數都聽過下嘅。」
有時我實在係諗唔明，QQ同YY個腦究竟裝咗幾多嘢？又要讀書，又要扮靚，又玩音樂，重得閒講人八掛…
A：「妳係咪諗住自彈自唱？」
Q’：「我真係無咁嘅功力呀…重要日文添。」
A：「咁呀，睇怕都唔會有人識唱，無辦法啦，唯有聽住相川七瀨把聲先。」
P：「呢首嘅話我OK呀！」公主舉起手。
眾人都大感詫異，將目光投射去呢個女仔度。




A：「真係識先好喎，唔使勉強自己嘅…」
P：「得啦，你彈個E major嚟畀我tune一tune把聲先。」我睇得出，連佢條仔Charles都嚇咗跳。
A：「睇嚟係嚟真㗎喎，洗耳恭聽呀下。」
團長彈咗一抽音符出嚟，Priscilla就跟住喺度吖吖吖，我大概知係乜嘅，中三音樂堂都考過聽聲辨key，我而家只慶倖下年唔會再有音樂堂。
音樂一開始，就已經係一段好重嘅低音結他聲intro，喺Queenie姐姐入咗beat之後，團長就即刻收細咗個背景聲，隨之而嚟嘅就係Priscilla嘅歌聲同埋Gabriel嘅結他聲，加上團長即興嘅和音。
明明頭先等船嗰陣，Prscilla把聲重係港女公主病咁嘅雞仔尖聲，點知一唱起歌上嚟係非常之穩實，每一粒音都可以壓住咁唱出嚟，而且一聽就知啲日文歌詞佢係非常之熟悉，唔使一路諗一路唱；而呢首歌…首垃圾Viva簡直係無得比，嗰啲只係過時嘅香港情懷，呢啲先係真正嘅rock。
今次Gabriel無再瞇埋眼喺度即時編曲，而係好努力咁彈返原來首歌嘅音符出嚟…應該？因為我都只係第一次聽呢首歌，只係感覺到得個樣當年呃妹妹仔嘅檸檬係唔會彈到，雖然如今佢已經變咗個大叔。Gabriel同Queenie互相對望，用雙手奏出嚟嘅音符承托住對方，兩邊都唔可以有乜差錯，就好似玩緊二人三足咁，明明中間企咗個Priscilla喺度，但喺佢哋眼中公主呢啲只係如浮雲般嘅透明…
喺我眼中，佢哋全部都係神人，但我睇得出今次連YY都好肉緊，所有人屏息靜氣咁睇佢哋嘅演出，因為實在係太有震懾力。