為了實現媽媽遺願，我成為了女兒國唐僧: 820

「我哋係嚟玩，唔係嚟練管弦樂！大家夾手夾腳掉佢落海餵鯊魚！」
A：「冷靜少少啦！嚟到呢度就梗係玩㗎啦，只不過我有件新玩具想同大家分享下咁啫。」
穌哥佢抬咗一大嚿嘢上枱，然後揭開塊布，再攞咗成抽線出嚟左插右插，睇嚟佢係堅㗎喎。
我：「乜佢唔係指揮嘅咋咩？」我細細聲講。
Y：「佢癲㗎，你唔好問咁多啦…」
以我有限嘅知識，佢嗰set應該係DJ嗰啲嘢嚟，就好似QQ所講，佢嗰部唔係電子琴，而係keyboard，上面多咗排制同slider，見過佢做啲變調同效果音，但係…明明電子琴上面咪又係n多粒制…音樂嘅世界實在令人困惑。
只見Alfonso佢捽下㩒下，隨即有啲聲音播出嚟…
A：「我驚大家未瞓醒，整首金句王嘅歌同大家熱下身先，雖然老餅都in in哋嘅…」
然後佢㩒幾下制點咗黎明嘅眼睛想旅行。
只見佢輕描淡寫咁打咗段純beat嘅intro，直到系統播出原本嘅音樂，佢唔知點樣扭屈低咗原來音樂厚重嘅拍子，換成佢心目中嘅effect，唔止咁，佢重喺拍子之間加咗啲自己想要嘅電音音符，就好似…將首歌變成新派古典曲風咁。




佢一直保持住希索加嘅微笑，團長清靜明晰嘅眼神，穌哥吸引門徒嘅魅力，雙手不停施放出操作系嘅念力…唔得，佢真係好勁。
頭先顧住打機嘅幾個男仔，已經好自然咁企咗起身，上身䟴下䟴下，個口好似著咗魔咁喺度唱…如果想開心，為甚麼需要等…呢度全部人都係玩開音樂，佢哋對聲音有住非一般嘅共識，好快所有人都企晒起身，而YY都捉住我隻手拉起埋我…眼睛想旅行！
然之後班細嘅好似已經一早綵排好咁，啲女仔攝入男仔中間，再捉住佢哋嘅膊頭，好快就出現咗一條人龍！喺小學嗰陣會玩嘅謎之遊戲，火車瓹山窿！喺連鎖反應下，我亦順理成章咁搭住咗YY個膊頭，而我後面亦都俾人捉住。就係咁，廿幾個high撚大晒嘅小朋友連成一圈喺間約莫三百呎嘅艙房入面圍住兩張茶几喺度轉。
甚麼都想即愛即有，甚麼都可即演即奏。
團長佢開始舉起右手，跟住節拍咁轉下轉下，左手繼續喺個DJ台上面揮舞，佢…應該想做某啲指揮？作為音樂白癡嘅我當然一竅不通…
甚麼風光都看不夠，地廣天高跟你去到處走…
接著幾下捽碟再拉長個尾高音，突入一下好勁嘅爆炸聲，全場所有人即時喺原地跳一百八十度掉轉個方向，就連我再內…團長嘅操作系…唔止對應緊佢手上嘅工具，啲念力已經控制埋我哋嘅活動，彷彿所有人變晒佢嘅扯線工仔。