為了實現媽媽遺願，我成為了女兒國唐僧: 799

我：「間唔中一次咋，都算係初中畢業紀念。」
Q：「算吧啦你，有女喺度就讕係大方。」
我：「呢啲…都算係風度嚟嘅，係呢，妳又會咁晏先返到嚟嘅？」
Q：「因為要準備星期五演出囉，你估好似你咩，考完試就乜都唔使做。」
我：「唔係囉，我今年有波踢呀！」
Q：「咪又係我叫你玩你先去玩，又唔使報名費，都唔明你要考慮啲乜。」
我：「哼，我係…諗起要幫瘟神條氣就唔多順。」
Q：「無計啦，鬼叫你唔係綠社，係無阿健咁好彩㗎喇，我都重未問你，入咗邊班呀？」
我：「順利讀到physics，如果唔係我攬住妳喊啦…」又或者lunch嗰陣攬住Wendy喊。
Q：「呵，唔俾我臨尾轉咗bio㗎咩，可能我想做白衣天使呢？」魔女妳就有份…




我：「唉，妳鍾意啦，我都理唔到妳咁多。」呢個衰妹次次都玩我，我學咗佢懶得諗咁多。
Q：「你下年有四個女神同你做同學。」
我：「呢啲嘢是但啦，我剩係關心屋企個衰妹。」
Q：「咁又要麻煩你準備煮嘢食，唔好餓親人哋。」
我：「嚟個抱抱先啦，要補en呀。」
雖然佢把口就衰啲，但對我都幾好嘅。
Q：「喂！作死你呀！做乜打我pat pat！」
我：「有人曳，要罰下佢，如果唔係無飯食。」
就係咁，我抱住佢拍咗幾下，身體亦都好唔小心咁即時有咗反應，我諗佢係feel到嘅；然後我哋對望一下，感受非常複雜，好似滲雜咗好多唔同嘅感情入去，總之我哋就會繼續相處落去。
入到廚房開爐煲水等淥麪，我攞部電話出嚟玩。




Y：『聽朝九點鐘，喺返熱狗店門口等啦。』
搞乜鬼呀，可唔可以近啲啫，都唔知行定搭車去…
Y：『作死你呀，夠膽唔覆機，諗住唔返學嗱？』
然後過咗一粒鐘，佢send咗最後一條message。
Y：『哦，同乖乖女偷食，精盡人亡，明嘅明嘅，我知你聽日會出現，如果唔係後果自負。』
乜喎，點解個個都係要講到我同韻婷有嘢咁，我就話無乜所謂啫，但都唔想毀佢清譽，明明男仔同女仔就可以有段純潔嘅朋友關係，應該係。
我盡人事覆咗佢一個OK emoji，唔想再糾纏。