為了實現媽媽遺願，我成為了女兒國唐僧: 784

B：「呀爽，嗱！第一，我唔會希望你打假波放水讓我哋社，我亦都無嘢可以畀到你，第二，我哋嘅戰術你到咗嗰日就自然會知，點我都唔會同你講。」
呢個社長…認真到…我好似俾人軍訓咁。
我：「放心啦，我會盡全力幫紅社攞冠軍，無論你哋有乜戰術都好…我想同妳商量嘅係其他嘢。」
B：「既然係咁重有乜嘢好謦？」
我：「不如坐埋一二邊先講啦。」
B：「有乜嘢唔可以企喺呢度講？」
呢個師姐…硬磞磞咁，抵個個都係齋睇妳對波而無乜動作，喺妳隔籬一定好唔浪漫。
當然我都唔係一個客氣嘅小朋友，反正妳對我嚟講都只係一個合作嘅對像，唔驚妳對我點，所以我就捉住佢衫袖：「嚟啦，呢度人來人往…」
佢無特別反抗，有啲無我咁好氣咁跟住我，行咗去公屋地下啲凹位入面啲凳度坐；唔好問我呢啲位有乜用，通常公屋就會有，大概喺大電箱隔籬咁，當然如果係Carmen姐姐就可以做多好多嘢。
我：「師姐，如果我哋社贏咗，我可以令妳逃過一劫避免失去初吻嘅命運。」我決定直接了當。




B：「吓…吓？點解…你會知！？」
我：「你哋社長開會咁歡樂，我身為學校無所事事嘅特務一個，梗係要嚟偷聽。」對住瘟神我會支吾以對，Bubble咯，咪大方一啲囉。
B：「你個死人爽…真係曳到爆！」咦，佢面紅喎…
我：「唔緊要啦，呢啲小事嚟啫，總之我係嚟企喺妳嗰邊嘅。」
B：「做乜喎…係咪好想笑我啫，咁二千蚊真係唔算少吖嘛，惜一陣…咁都係玩下啫，唔係喎！你點會知道我初吻，明明無講…呀，唔通係Carmen，但…就算係佢都無理由會知…」平時威風凜凜嘅綠社大波社長，竟然一講起呢啲嘢就好似亂晒方吋咁，口窒窒唔知講到去邊。
我：「佢無話知，不過佢可以推測。」
B：「咁就算係又點喎。」Bubble扮到一面冷不在乎咁，實質塊面紅紅哋，頭頂開始出煙，眉心開始滲汗；估唔到佢有咁極端嘅反應，俾著我以前，一定會同佢講，無乜點，咁我而家同妳玩下先，費事妳蝕咗個初吻畀瘟神，然後慢慢哄塊面印個嘴上去，就測試下佢會唔會打扁我，縱使我唔係鍾意佢。
如今當然唔會，萬一QQ知道咗我死九次都唔掂…
我：「無乜點，但我可以令妳逃過厄運。」
B：「唔需要囉，因為冠軍將會係我哋社。」




我：「咁萬一唔係呢？」
B：「到時咪知囉，你唔會打擊到我信心。」
我：「贏輸我其實唔care，心態上都係落場踢下波，叫做參與下學校活動，不過我都係會傾盡全力嘅…我只係想講，如果我哋社真係贏咗，我可以令到瘟神佢唔同妳打茄輪。」