thriXt Qantasy 純文字安眠之作 (New: - U2K - 一直上架): 781

Y：「咁你就咪咁多廢話啦，我已經好多嘢煩，總之嗰日我要你九點前就出到門口，有乜嘢我會再通知你，你同我乖乖地聽指示就得。」
我：「吓…咁咪同返學差唔多早…」
佢無再理我，然後就走咗，而家真係唔方唔輪到我多嘢煩，星期三分班，星期四陪佢癲，星期五踢波，我竟然覺得溫書考試係比較輕鬆。
小息後對多一科，自己check埋卷，先生都懶得理我哋走人先，由得我哋自己喺度玩到夠鐘走人放lunch。
W：「晏晝重返唔返嚟？去睇下學科資訊活動？」
我：「唔喇，一早諗好咗邊科讀得掂就揀邊科。」
雖然我口講話要同QQ做同學，咁係因為我估佢會讀理科啫，我未傻到會走去陪佢讀中國文學，呢樣嘢係無可能發生嘅，就算佢真係走去讀我都只可以嘆人生有太多不幸。
W：「嗯，但我諗我要細心思考一下文科同商科嘅選擇同出路，先生講啲嘢太標準，我想睇下會唔會有師兄師姐畀到其他意見我。」
我：「啱嘅，揀啱科係好重要，認真啲係好事。」
W：「咁我去搵啲女仔friend食飯，睇下有無人陪我一齊返嚟先。」總覺得，佢眼裡係有帶住一點點嘅哀愁，雖然就唔知為乜喇…而我亦都無辦法幫到佢，千祈千祈唔好為咗同我同班揀理科就得，萬一學校睇漏眼真係俾佢讀我都唔知點算…




之後，我哋三條仔又好有共識咁一齊食飯。
健：「你應該一天都光晒，就嚟唔認得人添啦。」
我：「一日未知結果…所有嘢都重有變數。」
康：「唉，你哋就好啦，目標明確無煩惱。」
健：「做乜喎，你啲水皮嘅科都合格晒啦，叫做交足功課，無人可以鬧你喇掛？」
康：「你估我重係驚人鬧咩，我驚我自己揀錯科玩死自己咋…」
健：「傻啦，讀書又唔係大晒，大把大人都話自己讀書學返嚟嘅嘢畢業之後就無再用過。」
康：「夠有好多大人話因為細個無好好讀書，結果行咗條歪路，蹉跎咗好多時間。」
我：「晏晝…攞埋啲成績去問下師兄師姐點睇囉，佢哋讀完三年，應該可以分享到啲經驗嘅。」
康：「梗係會啦，我重有好多嘢煩，好似你兩個無憂無慮咁踢波咩？」




你講呀？我煩緊嘅嘢多到就快爆。
健：「無事喎，試又考晒，都係煩埋呢四十幾粒鐘啫，到時一切塵埃落定，我哋咪再約出嚟一齊打傳說囉，又唔係同班先叫做friend，阿媽畀返部電話你未呀？」
康：「畀返喇…考完嗰日就，但無玩成季，應該渣咗好多，英雄池又加咗，miss咗好多嘢，攞返電話之後都未提起勁去update隻game。」