為了實現媽媽遺願，我成為了女兒國唐僧: 755

同樣都係3D game，揸貨櫃車經常性會揸到瞌眼瞓釀成交通意外，相反揸飛機會令你神經緊張，差在未攪到你嘔奶消化不良，無論幾咁聚精會神，炒飛機都係每隔幾分鐘就會發生。
就算啲敵機唔打你，揸飛機都已經夠晒難玩，當我一想追住啲飛機嚟打同射…飛彈，結果又自炒墜機；一玩就幾粒鐘，終於學識喺啲山谷入面飛。
落住雨嘅山溝，即係雨溝，攝隻飛機入去，追住前面嚟打，乜春都射晒出嚟，咪話唔爽。
「咔嚓。」正一女大不中留，成十一點先返屋企！
我：「Queenie，妳返嚟嗱？」現實嘅我，只會係一隻搖住尾包嘅看門狗，笑面迎人咁等待女主人。
Q：「嗯…出咗成日街，攰死我。」
呢個時候，佢嘅右手多咗個手抽紙袋，左手手腕…
我：「嘩！呢隻咪係大名鼎鼎嘅Apple Watch！」
Q：「咪咁大驚小怪啦，通街都係…」
我：「呢樣就係妳嘅生日禮物？」




Q：「唔通我自己走去買咩？！我先唔會咁嘥錢。」
我：「妳個樣咁唔興奮嘅？好歹都二三千蚊。」
Q：「唔止添呀，呢隻係不銹鋼series7配時尚皮帶，唔係普通版嚟，大約夠買三部你嘅電話，我都唔得閒計。」望落又真係唔同，平時喺街見到通常係啞沙金屬色，佢呢隻反晒光咁，而且紫色嘅皮帶令佢睇落成隻名錶咁。
我：「咁…妳唔係應該欣喜若狂嘅咩？」
Q：「我似唔似係啲咁嘅女仔呀？如果有人送勞力士畀我咪要以身相許？唔講住喇，我要洗白白。」
接落嚟又係QQ嘅寬衣解帶環節，不過今次要解埋錶帶，睇得出佢已經散晒，無話特別開心。
我當然唔敢掂佢份生日禮物，行埋去近距離望一望，係錶一隻嚟；收到啲咁貴重嘅禮物都無乜反應，搞到我更加唔知應唔應該送嘢畀佢好。
睇嚟，佢條仔都面對緊同一個難題。
最諗唔明嘅係，明明瘟神乜都得唔到，而且重要知道QQ已經有男朋友，重要摏個頭埋去，送隻五六千蚊嘅錶畀佢，唔通佢真係好有錢？好在我唔係女仔啫，如果唔係收到啲咁嘅禮物睇怕會把持唔住，擘大大髀咁鉗住佢。
其實男仔都鍾意推女仔落床，唔一定話要靚女㗎，有需要起上嚟就好壞通殺，好似細蚊咁都唔錯；點解做女仔成日都要講矜持呢，見到鍾意嘅男仔點解唔可以主動騎上去喎…雖然呢個世界重有好玩得嘅大卡車，㨃完草揩撚大咗嘅Angel，發神經女魔頭Yvonne…不過QQ就似乎對呢啲水魚無乜興趣。