thriXt Qantasy 純文字安眠之作 (New: - U2K - 一直上架): 754

W：「如果…你煮餐生日大餐畀佢食？」
我：「會唔會過咗界，我同佢朋友嚟㗎咋…」
W：「點知你哋，根本就無人知你同佢有幾friend，但我覺得佢既然肯同你做朋友，一定有你嘅過人之處，唔係為咗收你份生日禮物，可能你默默咁喺佢身邊已經係最好嘅禮物。」
同QQ住埋一齊咁耐，我畀佢嘅嘢已經好多，風筒，電子琴，直播用嘅衫，平時嘅飲飲食食；只要佢有需要，而我又尚且負擔到嘅都會盡量滿足佢，所以到佢生日我都唔知有乜可以送。
我總無可能送個幾千蚊嘅手袋畀佢，加上唔知佢鍾意乜嘢款；但佢就送咗本寫真集畀我，如果佢生日我乜表示都無佢會唔會唔開心…
我：「佢呢啲…遲下再算，妳係咪鍾意呢啲屋仔？或者我都可以砌間比妳，雖然唔知妳幾時生日。」
W：「唔使喇，唔想增加你煩惱，你嘅好意我心領，呢啲屋仔係幾靚嘅，但真係無位擺，加上會衍生一個好麻煩嘅問題。」
我：「嗯？係乜嘢問題呀？」
W：「你要知道，呢啲手工品放得耐係會變殘，又唔可以用水洗，唔小心嘅話重會有機會整爛，假如…有一日我要親手掉咗佢嘅話我會好唔開心。」
我：「咁就簡單啦，到時我再整過第二間畀妳。」




W：「信你呀，順口開河，講就易。」
我：「唔會吖，砌呢啲唔係太難，我諗都係兩日嘅事情，到時妳搵返我咪即刻買包嚟砌。」
W：「係呀，唔通十年無見我突然之間搵你就係為咗砌屋？」
我：「無所謂㗎，禮物出門…終生保養嘛。」
W：「咁更加唔好送畀我，太重禮我收唔起。」
然後，我就送咗Wendy返屋企。
回到家，一個人，考晒試，無嘢做，隨便煮，亂咁食，喪打機；無咗個女人喺屋企，又可以過返頹廢嘅生活。
順便走去睇下有乜game啱我張display卡玩，嘩，Steam入面嘅Ace Combat 7賣到兩折，一餐飯多啲嘅價錢就可以搬返屋企，一於買嚟打下飛機先，點知一㩒安裝先同我講要成六十幾GB位，搞到我又要搬片，呢個年頭真係…