為了實現媽媽遺願，我成為了女兒國唐僧: 733

Q：「我諗住考完試之前都唔再播，所以今晚咪播耐啲囉，希望佢哋記得我啦。」
我：「係嘅，溫書對妳嚟講係好重要。」
Q：「其實我都有啲frustrated，假如我溫少啲書，可能都只係少三五分，以我而家嘅狀態守住頭四十名係無乜難度，唔會影響到我揀科，但係如果我成積退步嘅話又會唔係幾好睇。」
一般嚟講，QQ都係考全級頭二十名內，如果跌到去三十幾係會唔太好睇；但如果以揀科嚟講，一班係會有三十幾人，只要你考到頭四五十，基本上就任得你揀晒所有科，所以考得再好都唔會有乜實質嘅作用。
我：「抖下啦，而家財政又無乜大問題，其實我都啱啱請咗七月前嗰個星期嘅假。」
Q：「算你啦，原來你都知道要溫書，不過呢，暑假嘅開支其實會比平時大㗎，我點都要出去同人玩下，而且又要買新書，你知啦，我係…唔可以買二手書。」我知…重有新衫褲鞋襪。
我：「唉，明明我同妳一齊住，都唔明點解我要買書，嘥錢之餘重嘥埋位。」
Q：「因為，你係唔可以永遠坐喺我隔籬囉，就算係我都唔會容忍你係咁用我本書。」
我：「嗯…唔緊要啦，到咗暑假妳就好得閒，到時咪播多啲囉，而我都或者會有得加班。」
Q：「到時先算啦，考好眼前嘅試比較緊要。」




我：「其實…妳諗住揀邊科？」
Q：「做乜呀？你係咁想同我做同學吖，定係怕我監視你所以想避開我呀？」
我：「梗係妳讀乜我讀乜啦，如果唔係我何來功課抄呀？」
Q：「就係咁簡單？你個大懶蟲吖！」
我：「咁至少…我可以問妳等妳教我嘛。」
Q：「好呀，如果我讀中西史，甚至乎文學呢？」
唔係咁大整蠱呀？邊有人咁好成績讀埋啲咁嘅冷門科㗎…至少都經濟，BAFS，或者Geoga啦。
我：「咁…咁…我投降。」背到傻，唔啱我。
Q：「呵，其實呢，以我嘅成績，文理商都唔會差太遠，讀邊範都死唔去嘅，如果你剩係諗住跟我讀嘅話，我驚你最後嘅結果會慘不忍睹。」
我：「女王唔好玩我啦…不如，一齊認真諗下要讀乜吖，妳揀返啲真係想讀㗎啦。」




Q：「唔諗喇，physics，M1，睇下搭多科乜。」
我：「原來…妳一早已經決定好。」
Q：「唔止我㗎，Uranus計數最叻，佢一早揀咗physics，chem，搭M1或者M2，Yvonne最功利，phy，chem，econ最多double count，所以走唔甩，Zilvia其實啱讀文科多啲，但佢屋企唔想佢讀啲無用嘅科，所以連bio都未必敢揀，而且bio會唔同班，估佢都係physics加econ加M1，我就跟大隊啦，我都唔想自己一個係bio班，相信我都讀得掂嘅。」