為了實現媽媽遺願，我成為了女兒國唐僧: 716

Y：「呀，我好驚呀！我絕對唔會跟你去台灣，唔會上工業大廈，唔會去開房，保證我一大叫就會即刻有人嚟救我。」
我：「有無諗過我只需要一下手刀妳就出唔到聲，三十秒內可以制服埋妳？」
Y：「殺咗我囉，如果你好想坐監。」
我：「Yvonne，妳會唔會讀書太大壓力…又或者感情方面出咗問題…」
Y：「我過得好好，我嘅私事唔關你事，你唔聽話信唔信我而家命令你扮狗屙尿落枝燈柱度？」
我：「好，我收聲。」
Y：「今日我都玩夠，有需要我會再搵你，記得執埋啲嘢走，唔好整污糟人哋地方。」
講完佢就行開咗，沿斜坡行返落去。
到底，我身邊有幾多個人係正常？
又抑或是，香港地嘅正常狀態係個個都有啲精神病…呀，諗落其實Wendy先係最正常。




好在睇落Yvonne都只係想玩，只要陪佢癲下我應該唔會有乜危險，QQ都唔會有事。
我坐返上張凳上面，個紙盒入面重有兩隻麥樂雞，基於唔好嘥嘅原理我都吞埋佢落肚，反轉個汽水罐倒埋嗰十幾滴zero濕下個口；掉埋啲垃圾之後我就去咗公園入面個洗手間洗面，之後再慢慢行返屋企。
Yvonne妳好嘢呀下，咁鍾意玩吖嘛，一旦情況調返轉，我唔調教到妳雞都不如？最多同妳玩到雞犬不寧，雞鳴狗盜，雞飛狗走，狗急射雞。
返到屋企，有一種虛脫嘅感覺。
Q：「喔，做乜今日咁晏嘅？」佢喺度功課緊。
我：「無呀…心血來潮，去咗中心打下乒乓波啫。」
我有乜可能唔講大話，如果俾佢知道自己姐妹係啲咁嘅人佢應該發癲都似；本來想同佢講陪Wendy溫書，但諗諗下我又唔知Wendy去咗邊，又驚佢兩個可能有啲溝通，都係咪制。
Q：「你唔使咁喎，我又唔會唔俾你玩嘅，你鍾意咪去多啲，最緊要你搞得掂啲功課…係呢，我想問下你熟唔熟乃木坂㗎？」
我：「嗰四十六個妹？知道大概嘅…」
失驚無神問我啲咁嘅嘢，奇奇怪怪咁。




Q：「你唔係好熟日本妹嘅咩？唔使咁謙喎。」
我：「又唔係除衫，又唔係特別靚女，興趣不大喎。」講真，我download過啲寫真嚟睇，無特別。
Q：「但佢哋唔係日本最紅嘅咩…」
我：「妳日日喺屋企對住我，又成日睇我部電腦入面啲嘢，點會唔知我鍾意乜喎…」