為了實現媽媽遺願，我成為了女兒國唐僧: 708

我：「搵我做乜事呀，Yvonne…妳唔係同Queenie去咗食飯嘅咩？」一般嚟講，幾個女仔食親飯都會好似開國會咁謦國家大事，平時無咁早返嚟。
Y：「吖，我同邊個食飯又關你事？乜你同Queenie好friend咩？」佢帶住挑剔嘅眼神望我。
我：「唔係…普通同學啫，平時都只係見妳會嚟搵佢。」
Y：「我今日無胃口呀，所以無同佢哋食，我有份生物學嘅功課，想搵妳幫下手啫。」
我：「Nonono，我唔要做標本同解剖…」
Y：「你係咪黐線㗎，咁興奮做乜？係Bio有份營養學問卷，想搵你幫手填一填咋。」
呢排Bio教營養標籤得個背字，悶到抽筋，同性教育可謂差天共地；但，點解我無聽過有呢份功課嘅？明明我呢排上堂無乜瞓覺，唔通佢哋班教得快啲？
我：「做乜搵我呀，妳問晒妳班姐妹都夠啦。」
Y：「唔得呀，規定要有男有女，有唔同身形。」
我：「妳嗰班無人咩，使唔使走到過嚟？」




Y：「你睇落好人，應該會幫我。」
屌，擺到明係妳平時得罪晒啲男同學，到要搵人幫嘅時候就無人show妳，唔好以為我好妥妳囉。
我：「我諗妳有啲誤會，其實我係壞人嚟。」
Y：「但係Queenie話你其實OK好人㗎喎。」
我：「好喇好喇，係乜問卷，速戰速決啦。」
Y：「我未design好份問卷，你喺度寫低身高體重先啦。」佢攞咗本迷你memo book出嚟。
我：「可唔可以寫少1kg？」
Y：「咪玩啦，你又唔係女仔，同埋都唔係肥。」
難得地，我覺得佢講嘅嘢係啱聽，於是我就照寫體重落去，身高就多1cm啦。
Y：「咁你啱啱lunch食咗乜，要詳細。」




我：「學生餐A…係黑椒腸仔火腿雞扒飯…多飯多汁，飲凍奶茶少甜。」因為QQ關係我減咗糖。
Y：「你日日食啲咁嘅嘢得唔得㗎…」
我：「暫時重未死得…我都知唔好…」
Y：「咁你今朝嘅早餐呢？」
我：「我唔食早餐㗎…呀，咬咗兩塊朱古力曲奇。」
最後一罐黑罐差唔多食晒喇！
Y：「乜原來咁食法就會好似你咁牛高馬大？」
我：「我都唔知，或者無乜關係，不過我平時會煮菜同食生果㗎。」
Y：「最後，你琴晚晚餐又食咗啲乜？」
我：「琴晚，食咗雙餸飯，都幾大盒，有咕嚕肉同埋魚香茄子，雖然入面有蔬菜，即係洋葱，菠蘿，青椒，茄子呢啲，但其實好油膩，係咁啱琴日食一次，不過我有烚多一碟西生菜，重食咗個橙…哈哈…希望唔會太唔健康啦。」




唉，我都知好唔健康…除咗個橙之外。
Y：「乜無食到雞髀咩？」
我：「吓…點解食雞髀，雙餸飯邊有咁好…」
Y：「咁腐皮壽司又有無食到？」
大鑊…仆直…今次冚家鏟…點解…