為了實現媽媽遺願，我成為了女兒國唐僧: 686

我唔使波霸大姐姐同我玩變態嘢，亦無諗過要食人隻豬，我只係想同個普通女仔出去正經玩下，點解咁卑微嘅願望都咁難實現。
落咗地鐵，由於唔熟路喺IFC兜咗個圈先行到去碼頭，結果走咗九點半嘅慢船，要搭十點嘅快船，要一個人戇㞗㞗喺碼頭吽成半粒鐘；而且星期日快船都唔平，要成四十蚊一程，好彩條死仔包會畀返車錢我。
最弱智係十點快船其實追唔到九點半嘅慢船…都唔知做乜好，其實可以打返兩場傳說，但一諗到Kuromi就無心機玩，就算佢再同我玩，都只係畀面氹我開心，我先唔稀罕。
喺碼頭發怐愗，等到上船，坐喺船度望住漆黑嘅窗外；星期日晚唔會有乜人去長洲，除咗返屋企嘅離島居民外就無乜人，感覺好寂寞；唔知，幾時先會有女仔同我一齊搭夜船呢？
諗一諗，其實一陣要同細蚊搭船返嚟…但我唔係想要呢種；唉，好想有個女仔挨喺自己身邊。
胡思亂想坐到落船，望住阿爽send畀我嗰幅地圖，係東堤小築後巷山腳嘅一個公園仔，好似好恐怖咁，呢度咁多情侶同失戀青年自殺。
路程都唔係特別短，行咗成十分鐘先到，我離遠望到有個女仔喺公園行嚟行去，認得係細蚊嚟；雖然話係識佢，但以前佢嚟搵阿爽，我同佢打聲招呼就會自己閃人，頂多串佢哋玩得開心啲，基本上無乜交流。
都唔知同佢講乜好，迮迮臨送佢返去就算。
我：「Mandy，妳好…」
蚊：「太好喇，終於等到你！可以返屋企 ，我就嚟俾蚊咬死喇，快啲行啦。」




我：「嗯，行啦。」
蚊：「阿健唔該晒你呀，要你咁夜山長水遠入嚟接我，記得叫交叉仔請你食飯呀！」
我：「OK嘅，橫掂…我都無乜嘢做。」
就係咁，我同佢沿住一條黑黑地無乜人嘅巷，行返去大街嗰邊，一路上都無乜講嘢。
蚊：「呀，我想去個廁所先呀！」經過大街公廁。
我：「再唔快啲趕唔到十一點快船㗎喇。」
蚊：「唔得呀，我好急…」講完就入咗去。
唉，今次實趕唔到喇，早知頭先我跑過去啦。
好在我都睇咗船期表，十一點半重有一班慢船…
女仔真係麻煩，明明頭先個公園無人，喺嗰度淋花咪得囉…點解去咁耐㗎，已經成三分鐘。




等咗五分鐘先見佢出嚟，洗面洗到頭都濕埋，手手腳腳都係水咁，唔知做乜。
蚊：「頂，我畀蚊咬咗六七啖呀，陰功！」
我：「你自己咪係蚊。」
蚊：「哈哈，好好笑呀！快啲行啦。」
我：「唔使趕喇，得返一分鐘，無可能趕到。」
蚊：「咁重有船㗎？」
我：「有，搭半有架尾班慢船。」
蚊：「咁都好啲，如果返唔到去實俾人鬧死。」
妳嚟玩出事俾人鬧都抵啲，我為咗幫人結果搞到咁夜返俾人鬧，就實在好無辜。
然後我同佢去咗OK幫佢增值八達通，橫掂阿爽會畀返錢我，就幫佢增值咗一百。