為了實現媽媽遺願，我成為了女兒國唐僧: 685

我：「喂，細蚊，我嚟唔到，但我搵咗人嚟。」
蚊：「嗯，返到嚟就得，係邊個呀？」
我：「阿健囉，係得佢得閒啲。」
蚊：「哦，好呀，唔該晒你。」
我：「你而家無乜事吖嘛，個男仔…無對妳點呀？」
蚊：「無嘅，本身食完飯叫佢帶我走，點知佢去咗睇渡假屋，我知道佢想開房，於是咪趁佢入去問嘢嗰陣撇甩咗佢囉。」
我：「咁都好啲，妳而家安全嘛？」
蚊：「OK呀，我匿咗喺東堤後面嘅一個公園仔，呢度基本上無人，我都係玩緊電話。」
我：「咁妳就喺度等阿健啦，妳…電話唔會就快無電吖嘛？」
蚊：「吖，死火，原來得返二十咋！」




我：「咁妳收線就即刻send幅地圖過嚟啦，玩多陣好熄機，如果唔係妳想打電話都無得打。」
蚊：「知道，我乖乖等佢，咁你畀心機返工啦。」
我：「bye bye，記住小心啲。」
然之後我就收到幅地圖，send咗阿健個電話畀佢，又forward咗幅圖畀個傻仔。
應該無事掛，個傻仔唔識溝女啫，叫佢接個女仔按道理無乜難度，件事解決咗就好；不過我就有啲慚愧，望住超性感嘅QQ都無乜心情。
※※※※※
頂，女就你食晒，嘢就搵我做，正一好朋友。
長洲…對上一次去已經係小學嘅畢業旅行，除咗喺沙灘度玩數字球之外已經唔記得做過啲乜。
感覺上係一個無乜貢獻嘅島仔，都唔明點解咁多人會去玩，你話有拖拍就話啫；曾經，諗過如果約到Kuromi出嚟，就可以同佢周圍去，長洲都係一個選擇嚟。
Kuromi，妳真係好殘忍。




一個人坐喺架地鐵入面搭過海去中環，然後再轉船去長洲…都唔知為乜；我望住Queenie幅相，好想鬧鬼呢個女人，明知我無可能得到，重send過嚟做乜？但真係好靚，唔捨得唔睇；不過佢已經唔再係天真可愛活潑嘅Kuromi，而係腹黑毒舌難纏嘅Queenie。
Queenie，我無惡意㗎，借對波嚟揸下得嘛？
係你咁教我㗎，死人交叉仔…
如果我真係講出口，你應該會一拳打落我度，係咪？睇你個衰樣就知已經做咗佢嘅守衛。
就算Queenie畀我揸，都會一路恥笑我，睇我唔起，等我背脊骨落，反正妳係唔會有感覺。
交叉仔你揸Carmen對波，有個姐姐同你玩埋啲變態嘢；你連細蚊塊洗衫板都唔放過，結果食埋人哋隻豬；而我，空歡喜一場，到頭嚟要一個人去幫你接EX。
你兩個住埋一齊，平時都唔知會喺屋企做埋啲乜…反正就唔關我事，喺你哋嘅眼中我只係個細路，做乜都係名不正言不順，奇奇怪怪，而你哋就想點玩都得，點解咁唔公平？