為了實現媽媽遺願，我成為了女兒國唐僧: 664

Q：「如果你敢嘅話，我會詛咒你成世都識唔到女仔，無乜嘢。」青頭仔遇著老司機，高下立見。
健：「所以唔敢…不如，開下一場。」
都係打機好，諗乜鬼兒女私情吖。
呢一場絕對係硬戰嚟，喺下刪咗一千字之後，原來已經過咗廿幾分鐘，全世界都六神裝，我哋呢邊得返一個高地塔，而對方就重有三個。
『對唔住，女朋友啱啱嚟到，拖咁耐應該輸，求唔好舉報。』呢句係我方射手嘅遺言…
雖然明白一場拖咁耐係會有機會出現突發事件，但好心佢講過體面少少嘅理由吖，例如返工夠鐘當值；為咗同條女扑嘢而掛機，呢啲係仆街中嘅仆街，舉報佢就肯定㗎喇。
健：「少咗個團戰實輸，我去偷。」
Q：「吓…你走埋無輸出，真係實輸。」
健：「硬打都係輸，博一鋪。」
喺中間混戰一輪後，我哋明顯劣勢，所有人都半血以下，而對方就無乜傷過，唯有果斷撒退；阿健兩段位移後攝入草叢再改為反方向深入敵陣，對面見我哋兵敗如山倒就繼續全力追擊，好彩我哋三隻傷兵都僅僅趕得切返去泉水回血。




健：「快啲換復活甲呀！」
Q：「吓…但我係法師嚟喎。」
我：「唔好理喇，都係拖幾秒用…」
Q：「但我唔係好識㩒。」一直用法師嘅佢，基本上只會用默認嘅法攻同冷卻出裝，就算已經玩過好多場，臨急臨忙唔識轉裝都好正常。
我：「等我嚟啦…」回完血我一邊喺內城遊走，一邊伸手去QQ部機幫佢買復活甲。
Q：「做乜賣走我對鞋呀？！」
我：「留嚟無用，妳唔會有時間走動。」
Q：「呀，最後一個塔都就無血喇。」
我：「唔好理，快啲清中路兵！」
健：「正一低B仔，唔好同對面打。」




其實邊有得打，只要一入射程基本上就無命，就連我呢個坦克都唔敢出手阻止佢哋打塔；而又，對面其實傻仔咗，因為咁樣就會俾我哋清到一路兵，雖然我知佢哋好享受剝人光豬嘅快感。
孫子兵法有云：歸師勿遏，圍師必闕，窮寇勿迫。
想贏係要打爆人水晶，而唔係清光對面一草一木同人頭；正如想得到一個女仔，只需要攪到佢痴痴迷迷，喺濕潤嘅底褲同髀罅之間打開一道隙縫，攝到入去就完成任務；而唔係要個女仔剝到一絲不掛再擘開大髀畀你入，萬一佢覺得自己被羞辱，咁你就GG了。
我：「我去擋，妳打兵仔唔好打人。」
輔助同我一齊沖咗上去阻攔敵軍，個塔都重未冧就已經有無數華麗嘅大招沖住我哋以嚟，我哋連接觸兵仔嘅機會都無，唯一做到嘅就係令QQ打咗一波技能落啲兵度。
五秒後我哋雙雙陣亡，由於復活甲之前已用過，所以係真死…而呢個時候阿健已經帶咗兩隻兵仔去對面高地塔突襲緊。