thriXt Qantasy 純文字安眠之作 (New: - U2K - 一直上架): 656

我：「係呀，而且我名聲唔多好，如果啲無聊人傳我同佢有染就好麻煩…」
W：「你就真係大想頭，咁容易同女神有染？」
我：「個個男仔都係咁幻想㗎啦…不過…其實做朋友唔應該諗呢啲嘢嘅，唔好睇佢平時咁，單獨相處嗰陣係幾舒服，好似換咗個人咁。」
W：「我知呀，睇過佢同你買點心就知。」
我：「買點心…有乜特別…」
W：「未見過佢笑得咁真心囉，亦都無諗過佢會去行超市，當時見到我第一眼嘅感覺係你哋已經拍咗好耐拖。」
我：「傻啦…邊有咁易。」
W：「但佢又唔係住呢頭，點會咁夜同你行超市？」
我：「因為…佢就我啫，搭的士嚟搵我…」
對唔住…最終我都係要講大話，始終保護QQ先係我嘅首要任務，我又唔想叫Wendy唔好問。




W：「到底你點吸引到個女神夜一夜嚟搵你呢？」
我：「佢…溫書大壓力囉，又要煩惱點面對其他人，或者見到我佢會舒服啲掛。」
W：「其實我溫書都會有壓力。」
我：「咁妳都可以搵我嘅，半夜落樓下溫書都得㗎。」
W：「聽住先啦，不過我夜晚好難出嚟。」
好彩啫，我都覺得我太過信口開河，雖然佢搵我嘅話我係會赴約，但最好唔好啦，如果唔係妳哋嘅壓力就變成我嘅壓力。
放咗學，QQ音樂組又有聚會，阿健就話阿康份數學卷計漏咗兩分想去搲分，我就無呢個閒情逸致嘞，中西史再低分我都懶得望多一眼，呢排成日溫書已經好攰，我要返屋企抖下先。
返到去攤喺張床，放咗份數學卷喺枕頭隔籬，諗緊點樣先可以俾人扣少啲分…
「咔嚓。」
Q：「哎吔，你好朋友好煩呀，成日問我考完mid term幾時先可以一齊打機，不如你陪佢玩多啲啦，我無咁多時間…」




我：「吓…唔好啦，成日打傳說都好攰，而且…佢都無問我玩唔玩，我諗佢係想同妳玩啫。」
無咗阿康喺度，同佢雙排輸嘅話就好似我累咗佢咁，呢條友又玩得越嚟越認真，唔係講笑係真係攰，而且呢排我已經無咁上心，就連每日任務都基本上放棄咗，你估同兩個女仔打交道唔使時間同精力咩？
Q：「哈，你條友仔吖，望住份數學卷好似好陶醉咁喎？！」佢喺度奸笑咁講。
我：「無…無呀，咪又係爭妳幾分。」
Q：「你到底知唔知道，我由小學到而家花咗幾多精力喺讀書，而你只係啱啱開始溫咗幾個月咋…不過，我見你頭先俾啲兄弟羨慕好似好開心咁。」
我：「我…我…其實，都係嘅。」雖然唔想認，但今次嘅成積係令我有啲飄飄然，而且望到Wendy對我投以信心嘅眼神，我…係有啲…
我想成為一個有能力嘅男人。