為了實現媽媽遺願，我成為了女兒國唐僧: 647

我：「咁feel到嘅，再睇埋故仔嘅話，起碼妳寫嘅錯字一定唔會多先，雖然我未必識分。」
Q：「唔准搵呀，應承我。」佢用纖纖玉手抆住我隻手臂央求我，睇到佢咁樣我投降了。
我：「講下笑咋嘛…我都唔鍾意睇小說嘅，其實妳先啱啱開始寫，重要只係一個中三學生，邊有咁易紅喎，不過我諗妳寫落去一定會越嚟越好嘅。」
呢句係真心話嚟，網絡上咁多高手喺度，就算你有天份都無可能一步登天；剩係睇討論區啲人改歌詞就會發現有好多翻版林夕喺度，直播打機又係，明明大家玩緊同一隻game，你會以為佢玩緊唔同嘅嘢，深知自己無可能達到呢個境界。
呢個年代，讀書難，玩都難，玩完重要執IG show off…
我：「咁話畀我知用邊個app直播得喇掛？」
Q：「知嚟做乜，你已經有得現場睇。」
我：「咁我諗妳都係周末夜晚直播多，我要返工邊睇到咁多現場…」
Q：「咁就更加唔應該知，唔該你專心返工。」
我：「吓…咁好啦…我都係想聽下歌咋嘛。」




Q：「唔得呀，你聽啲阿叔嗌啤酒好過啦。」
我：「我應承妳唔會喺app睇，畀我睇下妳個profile同頭像都得掛？」
Q：「你記得你應承過我啲乜呀下。」
然之後佢遞咗部iPhone嚟我面前。
頭像無乜特別，就係佢頭先坐喺度直播嘅自拍，樣都係睇唔到，重點仍然喺對奶上面。
我：「黑桃女王の鋼琴練習室…個名點嚟㗎？」
個名咁中二嘅？因為要營造出低B妹嘅形象？
Q：「我臨時亂改㗎咋，可能會轉…本來想用返Kuromi嘅，但係又覺得唔係幾方便，於是我查下Kuromi中文點解，原來譯做黑咪，咁Melody係一隻兔，佢朋友都應該係兔嚟掛，但黑兔實在係太怪，所以改改下就變咗Queen Spade…」
我：「Queen Spade喺傷心小棧係有特別意思。」
Q：「我知呀，但唔好同我講橋牌，唔多想玩。」




我：「妳竟然會知…重以為妳實聽唔明。」
Q：「有乜出奇喎，某個女神教過我玩咪識囉。」
我：「女神？唔通係Zilvia？」最配合佢文靜形象。
Q：「唔係呀，係V…乜喎，邊個都唔關你事呀。」
我：「哦…但係妳肯定Kuromi係兔？同埋佢同Melody真係朋友？明明我就覺得佢哋嘅關係係比卡超同火箭兵團咁。」
Q：「唔好問我，我對呢套低B卡通無乜大興趣。」