為了實現媽媽遺願，我成為了女兒國唐僧: 646

Q：「有乳貼㗎嘛，自己擰轉面啦。」
唔知點解，我又真係聽佢話；佢著返件T恤之後無咗飛釘…不過佢就好似褲都懶得著咁，就咁著住條底褲繼續同我講嘢，係靠個衫腳遮到少少。
我諗，我哋嘅關係已經可以將布呢個概念刪除。
我：「辛苦晒妳…要妳用啲咁嘅方法嚟搵零用錢。」
Q：「唔好咁講，你去執枱重辛苦啦。」
我：「呀！係嘞，今日有兩個芒果布甸攞咗返嚟，我喺雪櫃攞出嚟一齊食吖。」
Q：「啱晒，真係彈琴都彈到肚餓。」
我同QQ一齊放咗工…雖然佢直播都唔可以叫做工，食返個甜品，實在係太過溫馨，非常幸福。
我：「咁妳受唔受歡迎呀，多唔多人課金？」
Q：「我唔知點去評定受唔受歡迎喎，第一日播…收到價值四百幾蚊嘅禮物，好似唔太差？」




我：「乜話？！播一晚就有四百幾蚊？」
Q：「哎吔，唔好咁激動住先啦，唔係啲傻仔課咗幾多我就收到幾多㗎，一般嚟講得四成左右，如果玩齊晒啲活動又meet到target嘅話，紅果堆大概可以收返一半，即係我頭先大約賺咗唔夠二百，同埋要儲夠最少一千先可以提款。」
我：「咁我都知唔係收得返晒，間公司都要賺錢，得四成好似少咗啲…但有百幾二百都唔錯啦。」
如果佢一直播落去，又有呢個收入，咁就同我差唔多，但難保有一天佢會大紅大紫。
Q：「無所謂啦，有得玩咪玩住先，賺到少少都好過無，點都叫做無本生利。」
我：「係呢，妳又會無端端諗到做直播嘅？」
Q：「無辦法啦，又做唔成女僕住，諗嚟諗去都係啲宅男毒撚傻仔錢最易賺，咪諗到做直播囉…」
對於佢嘅言論我都同意嘅，係阿健呢啲溝唔到女嘅先會課幾嚿水skin畀一個素未謀面嘅Kuromi，俾著我就一定要見咗面睇下點先再課，或者攞啲錢去吃喝玩樂買其他嘢好過啦。
Q：「鬼叫寫小說搵唔到錢咩！啲不知所謂嘅大作家個個買流量死掛爛掛，就算唔再up文嘅都喺度刷排名，一啲寫擦邊甜故嘅就阻頭阻勢，重有啲每日up兩次文，每次一千字嘅癲佬爛作家，唔夠佢哋玩呀，想每日賺幾蚊都難過登天！」
爛作家…乜呢個term咁熟口面嘅？




我：「咁我幾時先可以睇到妳嘅作品？」
Q：「無呀！唔准睇，我怕醜。」
我實在對佢佩服得五體投地，唔介意將自己身體嘅九成五畀晒我睇，但就怕我睇到佢嘅故仔。
我：「唓，我自己去搵都得，香港有幾多小說網喎。」
Q：「你又唔知我個筆名叫乜。」佢嘟起嘴。