為了實現媽媽遺願，我成為了女兒國唐僧: 628

我：「你點話點好啦，做朋友又唔係要睇樣嘅…不過蝦餃嘅嘢，聽日先再食啦。」
Q：「我無話要而家食呀，但遲啲可能會俾人買晒㗎喇，今日開始特價。」
佢學識搵平嘢買，究竟係好事定壞事…
我：「聽日放學去啦，比較順路，又唔使換衫，真係賣晒咪去返藥房買囉。」
隔籬邨唔係太遠，行十分鐘都唔使，但呢個鐘數我換衫自己出去買一大袋嘢再行返屋企好似好傻仔咁，講到底我唔係女神奴隸嚟。
Q：「而家去啦，你藥房剩係得蝦餃燒賣牛肉三款，超市齊啲吖嘛，買十包就慳八蚊。」
呢個扭嘢食嘅細路女呢…而且十分大想頭，一買就買十包，雖然買幾多其實唔太影響佢嘅消耗量。
我：「咁…但我都唔知妳想要乜。」簡單嚟講，我可以打電話或者影相send message問佢，不過都係好麻煩，雖然我動搖緊。
Q：「好啦，最多我陪你一齊去…算，我自己去好過，求人不如求己。」
佢講完就喺我面前換衫，拋開件T用過背脊對住我戴Bra，日日睇住咁嘅背影叫我點溝其他女。




我：「十包點心都重㗎…我哋一齊去啦。」
十包，對我嚟講好輕，對女神就重。
Q：「你知就好啦，快啲換衫呀，十點就閂門。」
其實我都係著返條長褲同波鞋啫，不過QQ真係好犀利，五分鐘就已經著得整齊企理。
女神之所以稱呼為女神，係因為你永遠唔會見到佢睡衣踢拖出現喺街度，呢啲係民女先會做嘅行為嚟；而佢喺屋企私人嘅一面，就只有我先睇到，就連佢條仔都無呢個優待。
我：「其實…怕唔怕撞到其他人？」
Q：「你唔見到我無拖住你咩，重有而家都成九點幾，應該就安全嘅，我唔想成日困喺屋企好似坐監咁呀，如果真係有人見到要造謠就造飽佢啦。」
同佢一齊出街確實係好開心，無論有無得拖手。
去到惠康我哋第一時間行去雪櫃，的確俾人掃得幾緊要下，但啲款仍然係齊嘅，包括我平時好少買嘅腸粉；QQ當然雙眼發晒光啦，無論係錢問題，定係地理問題，我都好難同佢方便咁喺附近飲茶或者去粥鋪食，外賣嘅話廿蚊兜腸粉又好似好傻仔咁…
Q：「四包蝦餃，一包珍珠雞，一包麻辣珍珠雞，四包腸粉…你覺得屋企冰箱塞唔塞到十五包？」




唔係佢左揀右揀，我都唔知公仔原來有麻辣珍珠雞呢啲咁搵笨嘅嘢，要辣自己滴幾滴辣椒油咪得…
我：「我相信，執下總會有位嘅，再唔係放兩包聽日食嘅喺下格就實無…」
突然之間佢呆咗望住我後面。
我：「做乜呀？」當我正想擰轉面…
W：「阿爽，你好嘢。」
「啪！」