thriXt Qantasy 純文字安眠之作 (New: - U2K - 一直上架): 618

睇嚟所言非虛，我就係一隻水魚。
我：「但係…我哋會拖住手㗎喎。」
我講完之後，QQ塊面突然變得紅咗。
或者我哋一齊喺被竇赤身露體都唔係大問題，但如果喺街俾人斷正拖住行街…
Q：「咁…我都有權派下兵糧嘅啫…拖下又唔會蝕咗忽肉嘅…你好唔想拖住我咩？食你嘅雞翼啦！」
我：「唔係呀，點會呢，雞翼好好味…」
重記得佢第一次拖住我，就係聖誕節為咗安慰單身嘅我，扮成我嘅臨時女朋友，點知就一直去到而家咁，當然我係想拖足一世。
呢餐飯食得好開心，有佢帶住我，唔使我睇晒成本閱讀理解咁嘅菜單，亦唔使諗牛扒要有幾熟；你知啦，我平時係對慣MC㗎嘛，學生餐ABCD係咁多；味道方面就，我諗唔係頂級嘅，但好味過大家樂一截已經非常之滿足，可以睇住QQ開開心心鋸扒就更加滿足。
我：「Queenie，荷包乾塘未呀？使唔使畀家用妳？」我睇住佢埋單，五百蚊找返幾十。
對某啲服務性行業嚟講，家用係有另一個意思，而我哋嘅就係真正嘅家用…除咗嗰啲羞於啟齒之外嘅事情，佢都服務咗我好多嘅，陪我一齊生活，一齊玩，重幫我溫書做功課，有佢實在好開心。




Q：「唔使住，我重有，平時好慳㗎。」
我：「啊，係呀，真係好叻女。」
睇嚟佢真係慳咗好多，已經成兩個禮拜無問我攞錢，而家叫做收支平衡咁我唔使擔心佢。
好自然，我哋又手拖手步出餐廳。
我：「其實而家先七點，分分鐘會撞到人㗎喎。」
Q：「據我所知就唔多同學住呢度嘅，畢竟係九龍塘，附近都無乜大型屋苑。」
我：「係啫，但嚟行街食飯都有可能㗎嘛。」
Q：「你自己驚就算啦，做乜要嚇埋我呢？」
總覺得，QQ一嚟到呢啲高級地方，成個人就會自在晒，乜都唔再擔心。
我：「妳覺得…妳男朋友有無機會喺度出現？」




Q：「吓，佢應該啱啱補完習，正常都係返屋企食飯…我就唔會話無時無刻都check住佢喺邊嘅，但如果佢同屋企人出嚟食飯，又未至於無可能，因為都係幾個地鐵站，算啦，唔好拖住。」
佢真係好得意，明明我哋就無拖手所需要嘅關係，但就講到被迫分開咁；我同佢，其實拖手只係為咗爽，其餘嘅已經無乜所謂，因為相處時間已經比一般情侶多咗好多好多倍，包括佢同條仔。
鬆手之後佢就揸住部電話執返頭先啲相放上IG，話晒佢而家好難得先有得食一餐好，當然要盡量把握機會發揮下。