thriXt Qantasy 純文字安眠之作 (New: - U2K - 一直上架): 617

後嚟麪包鋪加價，變做七蚊兩個，十蚊三個，我就食少咗；零用錢多咗嘅我寧願去M記食特價豬柳蛋漢堡，再後嚟cut埋，迫我食魚柳包或者個乜鬼痀僂芝蛋雞。
Q：「睇你同個包搏鬥都幾得意㗎喎。」
我…已經咬到個口無力同佢講嘢，我望一望個籃原來重有牛油提供；我飲咗啖水，撕開pack牛油，用手擘開咗剩返嘅大半個包，有個裂口之後就好分開好多，然後我攞把牛油刀嚟刮刮刮。
點解似曾相識嘅？我明明好少食呢啲包…
呢個時候QQ碗洋葱湯亦都送到上嚟。
Q：「喂，整一忽仔嚟畀我送湯吖。」我遞咗畀佢。
我記得喇！大快活個死人扒餐就係跟個咁嘅包，但嗰個重硬重難食，由於我嗰陣已經飽咗就直接放棄；唉，好懷念大家樂鐵板餐個焗酥皮湯，已經好耐無見過，睇嚟真係平靚正嘅嘢都留唔低喺度，往事只能回味。
我望住QQ食有我口水尾嘅麪包，一路（口趙）住嚿包再準備手撕第二個餐包，今次呢個淺色少少，好似有啲果仁喺上面咁。
我：「妳好鍾意飲洋葱湯？」
Q：「幾啦，平時無得飲吖嘛，唔介意你煲畀我。」




我：「如果我搵到罐頭版嘅就考慮下啦。」
Q：「唔使喇，咁你買返羅宋湯就得。」
雖然我對洋葱湯興趣不大，但係見到佢飲得津津有味都想試下嘅。兩個人嚟食飯，得佢嗌湯飲都幾奇怪下，但我哋呢啲貧苦學生…係正常嘅，無謂嗌咗我又未必鍾意飲啦。
今次呢個包，啲味再清淡少少，入面啲果仁係合桃嚟，由於個包無乜調味就顯得啲合桃粒好香；但無論如何，小朋友最鍾意食嘅都係充滿味精嘅麪包，而呢一刻對我嚟講，右女神就係最好嘅味精。
可以望住QQ滿足用餐嘅幸福樣，我成世剩係食石頭包都願意呀！其實都…幾好味嘅，有原始食物嘅風味，為卡路里覓食嘅原則…
Q：「嗱，畀你試下啦。」佢推咗碗湯去我面前。
我：「嗯？妳夠嗱？好細碗咋喎…」
Q：「我係想過下口癮啫，同你share一齊飲開心啲。」女神妳對我真係好，呢份兵糧…
即係QQ飲剩嘅小半碗湯，同埋佢用過嘅湯羹，每一個位都觸碰過佢甜美嘅櫻唇，同埋毒舌。冷靜啲…唔需要太過興奮，我哋早就唔可以用一般關係嚟形容，其他兵就算睇科幻小說都諗唔到世上會有啲咁奇妙嘅劇情。
但，我好想名正言順同佢惜惜，唔知有無可能呢？




呢個時候六隻雞翼都送到上枱面。
我：「其實我哋咁樣出嚟妳驚唔驚撞到熟人？」
Q：「驚㗎，但唔通永遠留喺間屋度咩？同埋呢個商場按道理就比較安全嘅，據我所知無乜同學住喺附近，但掉轉嚟講，我喺度同你食飯都唔見得有乜問題吖，我諗咗好多藉口㗎，有人問咪話你條傻仔做我兵請食晚飯囉，咁我見你咁慘都會勉為其難應酬下你嘅，最緊要唔好俾人見到我同你兩個半夜三更喺樓下便利店啫。」