為了實現媽媽遺願，我成為了女兒國唐僧: 587

唉，終於完結…好一日愚人節。
我…點解要咁做，我都唔係好知，只係知道…咁樣嘅話，佢會幸福掛…人嘅一生，幸福嘅時間未必佔好多，主因係大部份嘅人都係生在福中不知福，我爹地雖然成日同我講呢樣嘢，但係…我唔覺得佢自己做得到。
陪媽咪一齊shopping，買個上萬蚊嘅手袋，然後孭出嚟同Yvonne一齊行街，咁樣算唔算幸福？我都唔知，只係覺得自己無得揀必須要咁做，諗落都幾無謂；而家諗返，如果可以將啲錢，攞嚟買嘢食，同交叉仔一齊去玩，應該會幸福好多。
呢個黐線嘅死肥仔，同佢糾纏咗一個夜晚，已經無乜心情去討厭佢，反而係搞到我精神疲憊；以佢個款，佢個樣貌，佢個體重，應該好難會有女show佢，除非用錢去解決啦…我唔知佢過幾年會唔會去叫雞或者搵援交妹，睇落佢又唔似想咁cheap，總之我不作評論喇…
如果…佢聽我話，唔好再去攪其他女仔就好，唔係個個好似我咁硬淨，我唔想呢個世界再有多幾個Zilvia…希望死肥仔可以記住呢一刻嘅幸福，好好感恩咁生活落去；至於我會俾佢J到傻…是但啦，大把人J我，我係唔想諗佢點J我，但如果知道有人J我J到腳軟行唔郁…我嘅感覺，又有少少爽…唉，真可悲！
至於交叉仔雖然睇落一無所有，但傻下傻下又俾佢識到Carmen同Mandy，都好似幾唔錯吖，分開咗又有得做返朋友，可能係佢嘅福氣；而佢每個周末晚上落去酒樓為咗我捱騾仔，重一副心甘情願咁樣，或者…我都已經令佢過得幸福。
至於而家，我嘅幸福就係手上嘅現金。
雖然我唔會再洗腳唔抹腳，但今日好歹都叫工作完，係應該對自己好少少嘅；我快步咁行落商場底部嘅高級版惠康，Market Place，斷估個肥仔已經食到飽晒，亦唔會無聊到行超市掛…當務之急梗係趁我條PE褲同埋對襪重係又暖又香嘅時候攞去自J啦，嘔…
我兜咗一個圈，買咗一pack啱啱唔洗一百嘅刺身，一盒日本士多啤梨，就出返去超市門口對開嘅cafe買埋枝lemon soda坐低，唔理得喺人哋地方食超市食物嘅樣衰開起餐上嚟…親愛嘅帶子同北寄貝，重有馬姑羅赤身加比目魚，實在係太幸福，雖然比唔上日本嘅味道…
我重要唔要搵工？唔知…見步行步啦，至少今個月唔使再問交叉仔攞錢；況且就嚟考大考，我都要花多啲時間去溫書，可能到咗暑假，我生日埋十五歲先再諗。




食完嘢就搭車返歸。
※※※※※
我：「咦，Queenie放工返嚟嗱？早咗喎…」
我喺度做緊功課，亦擺咗本衛斯理嘅鬼混喺枱面，話畀QQ知我無因為佢出咗去就偷懶，希望佢會讚我乖啦。
Q：「嗯…返嚟喇。」佢好似有啲唔妥。
我：「妳…無嚟神氣咁嘅，無事吖嘛？」
Q：「交叉仔…我…你唔准話我㗎，我…失業喇。」
我：「呀…唔通，真係打爛碗碟俾人炒咗？！」
Q：「喂呀！重笑人…我邊有咁唔小心呀！」