為了實現媽媽遺願，我成為了女兒國唐僧: 575

迫於無奈之下，我同沙織兩個唯有配合佢影埋幅合照，希望之後唔好再難為我哋。
肥仔嘅身形係肥，厚，橫，但唔係高，大家可以將佢想像成一個橙色嘅腍柿咁，就連兩蓻四六分界嘅頭髮都有啲似腍柿上面塊葉；我嘅身高重要比佢高少少，人唔高，自然就手短，佢伸到長一長都見到鏡仔入面嘅我哋都有啲出界。
我：「得唔得呀你，係咪隻手唔夠長？」
肥：「妳作為一個女僕竟敢質疑主人？我話妳知我不知幾咁長呀，Kuromi妳係咪想試下吖？」
我當然知佢語帶雙關，但就唔會得閒理佢。
我：「係喇係喇，主人你快啲影啦。」
肥：「重好講，咪就係因為妳兩個企得太開囉。」
點解又唔講下係你生得太肥？為咗想快啲完事，我同沙織都企埋咗少少…點知呢個肥仔喺度度位嘅時候，竟然用隻手揩落我手踭同埋條腰度，咁我本身就梗係有做防禦措施，將隻手放喺身前擺喺小腹上面，唔會俾佢掂到我對波…
雖然我可以九成九肯定佢係特登，但又好難話佢咁樣郁一郁就係非禮嘅，所以我都係忍埋佢就算；等咗一陣張相出咗嚟，我同沙織快快手喺上面簽字，然後繼續我哋嘅工作，條肥仔就自鳴得意咁喺度睇相。
然後就再過咗一陣…




妹：「Anson主人呀，你都已經坐咗兩個幾鐘喇，差唔多係時候…」
肥：「乜喎，我好歹都有嗌嘢飲㗎！」佢一面不悅…
妹：「唔好意思呀，跟主食加嘅嘢飲同湯係唔計算在內㗎，所以兩個餐就係兩個鐘…」
肥：「咁重有我影咗相㗎喎！」
妹：「對唔住呀，影相服務係唔計消費額。」
肥：「使唔使咁斤斤計較呀，而家又唔係多人。」
妹：「雖然係咁，但如果由得你唔守課室規則嘅話，就會對其他主人唔公平，我哋好難做生意。」
我：「嚟啦，嗌多杯嘢飲啦，睇你個樣都唔爭在，乖乖地啦。」我由上而下望住佢，話佢知我係認真嘅，如果俾著平時呢…
而佢就攞住張menu左望右望，好似真係俾我嘅震懾力威嚇到，唔敢再喺度扭。
我：「睇嚟你都係飲礦泉水好喇，低卡呀。」




肥：「怕妳呀，就飲礦泉水…要一杯Perrier檸檬蜜糖梳打。」睇你知衰未，畀多四十幾蚊，咪由得你坐多半粒鐘囉；十蚊一枝Perrier，半個檸檬兩蚊，一殼幾十蚊就有一公斤嘅百花蜜，重有幾粒冰，呢門生意其實都幾好賺。
不過都有其他成本嘅，一隻高身嘅玻璃杯，一枝好長嘅金屬攪攪棍，一條可以扭三個圈嘅飲管，重有我呢個大小姐嘅人工。