為了實現媽媽遺願，我成為了女兒國唐僧: 574

肥：「嗱，上款寫給最型仔的Anson，下款寫可愛女僕Kuromi上，中間就幫我畫隻Kuromi，唔該晒妳。」畀少少錢，就好似想我畫蒙羅麗莎咁。
如果我有得揀，我想上款係給死肥羔Anson，下款係腹黑Kuromi上，上面畫到Kuromi揸住把刀切燒豬…當然，呢少少嘢我都識畫嘅，小學上興趣班已經抄過上百幅卡通畫。
我：「請問…Anson係咪a，n，s，o，n？」
肥：「無錯，叻女！」
如果你話唔係，我會直接寫Ancient，你呢隻無文化嘅古代肥豬…
畫嘅過程我就唔多講，寫N隻字細細粒其實都唔多睇到，但中間隻公仔就認到嘅；我講完句請慢用就迮迮臨走人攞返枝茄汁入廚房，而死肥仔就滿心歡喜咁攞咗部電話喺度影碟飯。
其實我都知做服務業係預咗要受人氣嘅，人工包埋㗎嘛；就算交叉仔返酒樓咪又係要對住啲醉醺醺嘅大叔…雖然我覺得肥仔黑人憎啲。
只求佢自己開心就好，唔好搞著我，我完全唔想理佢，要望就望飽佢。
肥仔佢嗌咗咁多嘢，當然就有排坐，而我哋都要招呼其他出出入入嘅客人，唯有諗住捱時間等到佢走就算。
肥：「唔該，我想影相。」




妹：「嗯，都可以嘅，每張三十蚊。」就算係幾咁唔情願，只要客人畀得起錢嘅話…
肥：「咁就妳哋兩個都同我影啦，難得呢度今日有兩位女僕當值。」每食夠一百蚊就可以加錢影一幅相，佢食咗兩個餐就啱啱可以影兩張。
然之後沙織就攞咗部Fuji instax出嚟。
首先，我幫佢哋影咗一張合照。
然後，沙織又幫我同佢影咗另一張。
當然，職業笑容都係無可避免嘅。
只希望佢得到咗想要嘅嘢之後，夠鐘就會走。
肥：「啱喇，既然有兩位女僕，就影張三人合照啦。」基本上聽到佢咁講我哋都即刻扁嘴，因為實在唔想再應酬佢，沙織望咗我一眼之後都嘗試去推卻死肥仔嘅不情之請。
妹：「唔好意思呀，Anson，每消費一百蚊先可以搵我哋影一張相，你已經用咗兩個quota喇，或者下次嚟有機會再影啦。」
肥：「但係，我見到張牌寫住消費一百蚊就可以邀請一位女僕影相，但係就無話影幾多張，按道理我連拍十張八張都得㗎喎，只要我畀得起錢嘅話。」佢一副得理不饒人嘅衰樣。




妹：「係，但係你搵我哋兩個一齊影合照又唔同㗎嘛。」
肥：「咁我又邀請咗Saori妳影，又邀請埋Kuromi同我影，理論上妳哋兩個都可以再同我影，咁影多幅三人合照又何問題之有呢？」
見沙織語塞，我決定又加多把口。
我：「影都無問題，但如果我哋兩個都入鏡又搵邊個揸機？無理由要勞煩其他主人幫你影相㗎。」
肥：「自拍咪得囉，平時得一個女僕都係自拍㗎啦，部instax上面有片鏡仔㗎嘛。」
我：「三個人喎，你唔驚影到出晒鏡呀。」
肥：「得啦，妳畀部機我，我識影，屋企都係用呢部，唔好喺度阿趦阿趄摩洛哥。」
你話吖…係咪令人好想打佢嘞，如果香港唔係有愛護動物協會同防止虐畜條例，我一早郁咗手啦。