為了實現媽媽遺願，我成為了女兒國唐僧: 551

「哈哈…對唔住呀妹妹，佢兩個醉喇，雖然我哋口衰啲，又無學識，但我哋好人嚟㗎，唔使驚。」
「你講乜呀，最鹹濕係你！個女都就考DSE，但個細佬先係幼稚園！」
Q：「咁…幾好吖，家姐可以幫手湊細佬，又可以教佢讀書做功課。」
「係呀！所以Queenie妹妹要畀心機讀書，千祈唔好學我哋咁。」
「重要搵個好男仔呀，切記唔好俾人呃咗隻豬。」
如果你哋知道咗佢已經一早無咗隻豬，一定就會好擔心自己啲女，現實係好殘酷。
「尤其係啲居心叵測嘅執枱仔，要戴眼識仔！」
Q：「放心啦，佢唔係壞人嚟，同佢亦只係朋友。」
「阿妹唔准講大話，男仔嘅朋友咪即係男朋友！」
「而家世風日下，就算朋友都可以做好多嘢！」




我：「叔叔你哋慢慢飲啦，我哋唔阻住先。」
再咁落去真係沒完沒了，於是我就夾硬拉走QQ帶佢返去原位坐。
「喂！死仔包！做乜搶走我哋個靚女？」
「叉仔你放棄吧啦！夾硬嚟係食唔到鮑魚㗎！」
「知唔知呀？吃不到的鮑魚是臭…」
「收聲呀！食你嘅鮑魚啦！」
真係胡鬧到一塌糊塗，何解得返幾分鐘曼聯同阿仙奴都可以相繼入波嘅，唔通QQ嘅出現確實如有女神助？
我：「對唔住呀，佢哋成日都係咁，飲完酒就亂咁噏，有無嚇親妳呀？」係時候展現出我嘅風度。
Q：「無呀，佢哋幾得意吖，男人就係咁㗎啦。」
我：「係咩…講到妳好似好清楚男人咁。」




Q：「係呀，我的確係好瞭解男人。」
我：「欸…知妳叻喇，咁妳坐喺度等我啦，唔好再理佢哋喇，我過去火窩counter收埋啲嘢先。」
Q：「嗯，知道，畀心機做嘢啦。」
執完個counter，班叔父都食完鮑魚飲完啤酒埋單走人，臨出門口前都有同Queenie say goodbye，而我就當然即刻衝過去執埋佢哋張枱，個火窩煲呢，入面啲烏冬蓉，餃皮蓉黐晒底我實在係無眼睇，都要倒清佢，加埋要收返嗰十幾枝吉樽，收枱布鋪枱布…攰死。
終於搞掂！同馬叔叔單聲之後我就放工，佢無講乜特別嘢，跟住我就同Queenie一齊走。
一出酒樓門口，Queenie就拖住我，每次半夜三更喺樓下佢都會拖到我實一實，好有偷情嘅feel。
Q：「嗯…今日無甜品賣剩呀？」
我：「呀。」然後我O咗嘴呆企喺度。
Q：「做乜呀？漏咗喺酒樓呀？」
我：「係呀…有一個芒果布甸…喺雪櫃入面。」




Q：「噢，咁真係可惜，暴殄天物嚕。」
我哋出咗嚟，馬叔叔佢已經隨即落閘。
我：「其實我衝返去，應該趕得切喺後門入去…但如果為咗塊布甸…」
Q：「咁就算啦，咪咁樣衰，餐廳平時都浪費唔少食物㗎啦。」
我：「嗚嗚，布甸BB…係我對你唔住。」
Q：「咪咁上心啦，係你自己無記性，而且我都食咗鮑魚，呀，係喇，我哋去食豆腐花吖。」