為了實現媽媽遺願，我成為了女兒國唐僧: 549

馬：「普通嘢嚟啫，而家大陸猛咁養，759都有得賣，一罐先百鬆啲，你都食得起呀，廿幾年前，邊有呢啲貨，香港人食親都係澳洲貨或者南非貨，嗰陣屋邨酒樓都會有好多人擺酒，成日放到成個櫃都係貴價鮑魚，家陣通常慳得就慳，擺壽宴都係求祈開罐呢啲燴生菜就算，無乜人識食…到你第時大個有錢，我介紹你吖，要食就食墨西哥車輪鮑，罐頭鮑之中最靚㗎喇！」
其實，我對鮑魚就無乜興趣嘅啫，不過聽佢哋大人講呢啲都幾有趣，叫得個知字囉；睇住馬叔叔開罐頭，每罐有兩大隻，倒出嚟放喺個碟上面切片，話咁快四隻鮑魚就變咗一碟鮑片，再執多碟脆花生叫我攞出去奉客。
出到去，已經見到QQ捧咗七枝藍妹過去，而且幫佢哋斟緊酒…估都估到啦，班大帝點會咁易放過位靚女吖，肯定當咗佢係啤酒妹；其實佢哋又無乜嘢嘅，唔會做埋啲傷天害理嘅嘢，係怕佢哋飲到醉醺醺亂咁講嘢，令到QQ難受啫。
「嗯，呢啲就似樣，非常好！」我放低鮑片。
我：「不如，我幫你哋斟酒吖…」
「呢度無你嘅事，快啲去執枱！係咪唔想收工？」
大佬…如果唔係你哋成日星期六喺度打躉，我一早就放咗工啦，重要喺度話返我都有。
QQ嘅眼神話我知佢無問題，應付得到，叫我去執埋啲枱，一齊住咗幾個月，我哋已經開始識用眼神嚟溝通，包括睇得出對方幾時發情有需要…
咁我咪行返去鋪枱布，一邊留意佢哋嘅舉動。
「小妹妹，我哋應該點叫妳好？」




Q：「叫我Queenie就得㗎喇，uncle。」
「Queenie…好名呀！真係好好聽！點解我唔識…幫我個女改㗎，搞到佢成個屋邨妹咁。」
「吖，你識幾多個名啫，又喺你嗰陣睇人名表喺A字見到Amy就揀，重話易記易寫。」
「咪係囉，而且你個女都真係屋邨妹。」
Q：「唔係吖，Amy個名好可愛呀，有溫柔嘅感覺。」QQ已經斟晒七杯酒。
「重咁識講嘢添，真係好乖女呀！點解我個女剩係識駁我嘴㗎？」
「重好講，又係你話頂唔順隻老虎乸，要惜晒個女等佢呷醋，由細到大縱到佢成個皇帝女咁。」
「係喇，阿妹，話明人頭藍妹，無理由妳喺度齋企㗎，我哋都過意唔去呀，不如妳斟杯陪我哋飲？」
佢哋真係當QQ係啤酒妹…
Q：「叔叔，唔係我唔想陪你哋飲呀，只不過…最衰我係細路女嚟，唔可以飲酒。」




咁嘅細路女…實在…我都唔知去邊度搵。