為了實現媽媽遺願，我成為了女兒國唐僧: 518

爸：「哈哈，咁好啦，你哋繼續做功課等開飯。」
Q：「你爹地真係識煮㗎？」佢輕聲同我講。
我：「佢買得就識㗎啦，佢好多嘢都識，連船仔都識揸。」
Q：「咁佢點解唔喺香港做廚師？咪唔使同你分隔異地囉。」
我：「欸…佢有講過喺香港做嘢好辛苦，做廚師尤其返工落地獄咁，重會好容易生cancer，咁我都覺得啱嘅，我返工嗰陣見到啲廚師都係好辛苦，五六分鐘就要炒好一個小菜，我成日都覺得佢哋唔係正常人嚟，同埋，可能佢覺得喺架船上面自由自在嘛。」
我諗，佢一定有喺船上面搵女人，咁就方便到佢唔使帶個女人返嚟俾我見到，避免咗不必要嘅尷尬。
Q：「又或者佢唔想對住你個衰仔。」
我：「乜喎，家下我好衰咩…我又無乜所謂，佢成日唔喺度對我嚟講都係好事，我都鍾意自由自在嘅感覺。」講就咁講，其實一個人日日對住四埲牆，不停打機同上鹹網都係會悶，結果就搞到我晚晚落去躝街，希望識到啲寂寞嘅女仔陪我一齊解悶，再進行各種各樣色色嘅事情…
Q：「可能你都係遺傳咗你爹地。」
我：「無所謂啦，生活始終都係要過嘅…」




Q：「係嘅，睇嚟，我都要開始諗下本小姐嘅生活。」
我：「放心啦，只要我喺度，一定會照顧妳。」
做完功課就開飯，菜色分別有椒鹽瀨尿蝦，我琴晚喺電話講嘅豉椒蟶子，一大碟炒菜，重有…一包蝦餃…
我：「點解…會有蝦餃嘅？」
爸：「你放到成個冰箱都係蝦餃，但我喺度嗰陣你又一包都無食過，唔使問阿貴肯定係Queenie嘅糧食嚟㗎啦，我煮唔到咁多餸呀，咪蒸包嚟當加餸囉。」
我：「咁你喺度煮飯畀我食又使乜食點心喎。」
爸：「嗯，咁又係，不過你以前咁懶都唔會存貨喺冰箱，塞到咁點都係可疑。」
我：「對唔住令你失望囉，有個犯完案唔識毀滅証據嘅仔。」
爸：「最失望係我以為你放喺度招呼女朋友，原來唔係。」
說來慚愧，以前招呼細蚊，都係同佢落樓下便利店同街市拮魚蛋燒賣腸粉多，至於Carmen就更加唔係點需要我嘅招呼。




我：「乜喎，你好想你個仔…咁快拍拖咩？」
爸：「如果你係乖乖地，正正經經拍拖，我又無乜所謂喎。」
我：「都三大碟餸，點會唔夠喎。」我決定轉移話題。
爸：「啲海鮮殼多過肉，睇落大碟㗎咋。」
Q：「唔緊要啦，我好細食㗎咋，多謝叔叔嘅晚飯，我哋快啲趁熱食啦。」
爸：「嗯，咁開飯喇。」
原來，一家人喺自己屋企圍埋一齊食飯嘅感覺，是這樣的；不過最開心都係望住QQ拆瀨尿蝦，雖然佢今次就唔會分半隻畀我食喇。