thriXt Qantasy 純文字安眠之作 (New: - U2K - 一直上架): 517

睇怕就唔會，我唔應該太多幻想，最後得出嚟嘅結果係我應該要打地鋪。
我：「係喎…唔記得咗妳要搬嘢返嚟添，你早啲同我講等我幫妳嘛。」
Q：「咪玩啦，你點幫我喎…，叔叔唔好意思呀，要霸住你啲地方先。」
爸：「唔緊要呀，妳隨便霸啦，反正都係得咁大地方，係呢，我而家落去買餸呀，Queenie妳有乜想食呀？」
我：「佢鍾意食瀨尿蝦！」
Q：「喂呀！我乜都食㗎，簡簡單單就得…」
爸：「瀨尿蝦咋，無問題吖，咁我落去街市買。」
Q：「咁點好意思喎，唔使咁客氣…」
爸：「唔使唔好意思，你哋平時應該都無乜啖好食，等我返嚟啦。」講完佢就出咗門口。
然後剩返我哋兩個喺度對望。




Q：「唔好郁。」然後隨即攬住咗我。
我：「做乜嘢呀…Queenie…」
Q：「可以返屋企實在係太好。」
我摸摸佢個頭，摟住佢個膊頭，嚟到而家，我已經唔會花費多餘心神去佢心口嘅觸感上面。
我：「係咪瘟神佢又喺度煩住妳呀？」
Q：「又唔可以話煩嘅，但你知佢㗎啦，唔應酬佢都唔得，如果唔係攞住個喼佢又話要同我食tea㗎喇，跟住佢又話要幫我攞個喼送我返屋企，好彩我話爹地揸車嚟接我先嚇走佢咋。」
我：「嗯，原來係咁，其實佢有無問妳點解要放個喼喺學校呀？」
Q：「咁就當然係，有㗎啦，不過我無答佢，要點諗就隨佢鍾意。」
爹地唔喺度，佢當然又係就咁喺個廳度除咗套校服出嚟，換返屋企衫，不過今次係有戴Bra嘅，我望住佢個Bra汞，覺得別有一番風味。
「咔嚓。」




爸：「咦，兩個喺度做緊功課呀，真係乖。」
Q：「係呀，我會好好看住佢，以後都唔會再俾佢偷懶㗎喇。」
爸：「唔該晒妳呀，妳睇下，重識郁㗎！」
老竇佢攞住幾大個膠袋，其中一袋就係瀨尿蝦，佢打開嚟畀Queenie睇，入面有六七隻大蝦喺度彈下彈下，不過由於呢隻生物成隻異形咁，加埋佢個名有瀨尿，所以我對佢從來就無乜好感。
Q：「呀…係，我見到。」
爸：「想唔想入嚟廚房同佢哋玩下先呀？」
Q：「唔…唔使喇，佢哋好似好慘。」