為了實現媽媽遺願，我成為了女兒國唐僧: 503

爸：「咁妹妹…Queenie妳…就住喺度先啦，唔使等我出船喇，聽日妳都留喺度啦。」
Q：「叔叔…」QQ已經眼泛淚光。
我：「好嘢！好嘢！好嘢！多謝爹地！」
我開心到彈咗落床！
爸：「唔好嘈住！我想講…我唔喺香港嗰陣你都無王管㗎啦，就算我話唔俾，其實都控制唔到你哋…但係，我有啲嘢要問清楚Queenie妳先。」
Q：「嗯，叔叔你問啦。」
爸：「妳係咪肯定暫住喺度對妳嚟講係最好嘅選擇？而唔係因為一時貪玩或者逃避問題。」
Q：「係…如果我住喺舅父度，就要五個人share一個廁所，而且重要瞓喺廳梳化…又無自己嘅電腦同書枱用，加埋，距離學校好遠，每日來回要搭好耐車。」
爸：「咁都幾陰功…另外我想問，妳同我個仔…相處到吖嘛，佢無對你…做啲乜奇怪嘢呀？妳喺度過得開唔開心㗎？」
我：「爹地呀！我邊有咁曳喎…」




Q：「無呀，我同阿爽相處得好好，而且佢都好照顧我，放心啦，我唔係細路女，識得保護自己，如果佢敢蝦我嘅話都唔會由得佢亂嚟嘅。」
爸：「嗯，如果有一日屋企叫妳返去嘅話，妳係咪會聽話，唔會要屋企人擔心㗎？」
Q：「咁當然啦，如果可以…我都想返自己屋企，同埋我唔同媽咪講咁多都係唔想佢擔心，我希望可以照顧自己。」
爸：「最後我想問下，咁妳啱啱個禮拜住喺邊？」
Q：「咪喺舅父度囉。」
爸：「嗯…阿爽，你又話要幫人，好意思要人哋返去舅父度迫嘅？點搞㗎！」
我：「咁爹地你返咗嚟，我又有乜辦法喎…」
爸：「你做乜唔同我講吖？咁大件事都唔話俾我知，你肯定你負責得起㗎？你知唔知人哋屋企可以告你禁錮未成年少女㗎。」
我：「邊敢話你知喎…點知你會點…」
Q：「叔叔唔好咁講啦，唔關阿爽事㗎，係我…求佢收留我喺度，我一定唔會令佢難做㗎。」




爸：「你以為瞞得幾耐吖？我重奇怪緊點解啲水電費會貴咗咁多，就算你拍拖得閒叫個女朋友上嚟都唔會貴咁多吖，返嚟睇咗你成個禮拜又完全無特別，我正想搵中電同水務處對下啲抄錶紀錄，check下個錶又無壞。」