為了實現媽媽遺願，我成為了女兒國唐僧: 502

Q：「嗯，但叔叔你放心啦！我保證以後唔會再上嚟騷擾你同阿爽嘅生活…」
吓？！女神！以後…唔會…點算好？！
Q：「只不過…而家咁夜要走可能唔係太方便，或者今晚都係要留喺度，但我聽朝就會即刻執嘢走㗎喇，非常之唔好意思！」
爸：「咁…妳留喺度，屋企人知唔知㗎？」
Q：「唔知…佢哋暫時都照顧唔到我，所以都無乜理過我…」
爸：「不如妳畀佢哋電話我，等我同佢哋講幾句先啦，如果唔係佢哋一定會好擔心妳㗎。」
Q：「我而家都搵唔到我爹地…媽咪佢…因為種種原因我唔想煩到佢，而且就算佢知道咗…都唔會對事情有任何幫助。」
爸：「妹妹妳…其實係咪離家出走？」
Q：「唔係！絕對唔係離家出走！我唔係壞女仔嚟…真係因為我屋企出咗事，暫時無家可歸…但你可以放心，聽日我會返去搵我啲親戚㗎喇。」
QQ一面委屈咁講，喺度住咗咁耐佢已經慣晒，如果佢被迫要長住返喺舅父度，咁同無家可歸其實無任何分別。




爸：「咁既然妳本身寄住喺親戚度，點解又會過咗嚟嘅？阿爽佢係男仔…唔係幾方便喎。」
Q：「呢個…即係咁…」
我：「因為喺親戚度住又迫又多人，無地方放自己嘢又無覺好瞓，同佢哋又唔好相處，所以咪過嚟囉！」睇住QQ一個人面對爹地嘅質問，我實在唔忍心再睇落去，唔知喺邊度嚟嘅男子氣概令我鼓起勇氣幫QQ回答咗呢條難以啟齒嘅問題。
Q：「交叉仔！」女神羞紅咗塊面…
爸：「我個仔講嘅係咪事實嚟？」
Q：「都算係嘅…但無所謂啦，現實係咁都無辦法，我會返去㗎喇，我都唔好意思再打攪你哋屋企。」
爸：「其實…妳喺度住咗幾耐？」
Q：「呢層…」QQ佢啞口無言。
算啦，已經唔可以再瞞落去…
我：「唔好趕走Queenie啦！佢喺度住咗幾個月㗎喇！佢唔會麻煩你㗎，爹地你唔喺香港嘅時候我先會叫佢過嚟，佢真係無屋企返，你就俾佢喺度暫住啦，好啦，爹地！」我跪咗喺床上面哀求爹地。




Q：「交叉仔…」