為了實現媽媽遺願，我成為了女兒國唐僧: 489

諗多無謂，繼續瞓比較實際；三個月無見老竇，一見就係十四日，我諗都無乜小朋友有呢啲pattern，通常聽返嚟都係返大陸做嘢要五六日先會見到爸爸；唔知佢今次會有乜手信拎返嚟呢？希望唔好又係啲無謂嘅民族手工藝術品；計我話，最好係可以變賣嘅，係外幣就正，日円、歐羅、越南盾、南非蘭特都OK，又或者黃金同鑽石，嘻嘻…
「咔嚓。」
爸：「仔仔！交叉仔！重瞓緊…？」
雖然呢幾個月我嘅生活經歷咗翻天覆地嘅改變，但我決定以不變應萬變，一切維持舊狀，用一個死小孩嘅面孔喺充滿QQ香氣嘅被竇入面伸個頭出嚟。
呢個老竇改到個仔成個名都係交叉，再咁樣嗌我，其實我都服咗佢，唔明點解媽咪會陪佢癲。
我：「爹地…返嚟喇？」
爸：「太陽曬pat pat喇喎，重唔出嚟？」
我：「星期日放假，天氣凍吖嘛。」
爸：「嗯…咦…架LEGO跑車呢？」
你話好唔好嘢，幾個月無見過仔仔，佢竟然係掛住份聖誕禮物去咗邊先…不過都係，我都要諗個藉口解釋得好好聽聽，畢竟賣走佢份禮物都唔係幾好。




我：「爹地…你知唔知架車砌完有幾大呀？完全無位放囉，就算個盒都超掗碇，所以我砌完之後放上網賣咗畀人喇…」
爸：「噢，重諗住…我今次返嚟可以自己砌一次，過下日晨添。」
我：「你想砌嘅話我上網收過第二盒畀你玩囉。」
爸：「咁又唔使，係呢，放唔放到個好價呀？」
我：「OK呀，七折有多…」
爸：「然後你買咗呢樣更掗碇嘅玩具？」
佢當然係指嗰部體積唔細嘅keyboard。
我：「係呀…想學下，咪買嚟玩下，都係上網二手收返嚟，嗯…今次有無手信呀？」我依依不捨喺張床爬出嚟，做下樣都要扮到期待下嘅。
爸：「哦，見你讀書有進步，所以呢…」
佢喺個旅行袋入面攞咗一嚿用bubble紙包住嘅嘢，再慢慢解開，入面係一大塊電子零件…電乜鬼子零件吖！




我：「係…係！nVIDIA嘅RTX-2070？！」我即場呆咗喺度，就好似一個第一次見到朱古力嘅小朋友咁，眼睛完全唔相信呢個世界會有啲咁美好嘅嘢，好到以為自己已經昇天食緊金莎。
爸：「嗯，係2070啫，又唔係3090。」講就咁講，但佢個樣係一面囂張自信滿滿。
我：「出面已經炒到四千幾一張…我…成績只不過係高咗幾分啫，真係咁…就有？」