為了實現媽媽遺願，我成為了女兒國唐僧: 488

Q：「傻㗎咩，係掛都掛住你爹地先啦，我同你聽日喺學校又可以見。」
掛唔掛老竇？其實都掛嘅，不過佢喺度其實都係咁樣，而且全日喺屋企我就無晒自由，以前就無得約Carmen或者Mandy上嚟…而而家，就要同Queenie暫時分開；某程度上呢，我係覺得失大過得嘅，始終老竇呢家嘢間唔中見下就好，連續十四日廿四粒鐘感覺有啲怪，唯一好處就係我可以做返個死細路。
我：「咁…Queenie妳今日有乜嘢做？」
Q：「一陣去舅父度放低啲嘢先囉，佢哋今日family day，我唔阻住佢哋喇，諗住去圖書館睇下書同溫書，晏啲就約咗男朋友，都係夜晚先會返去㗎喇。」
呢個QQ真係識運用資源，一無咗舒適的家就即刻搵仔仔打發時間，不過星期日應該有大人喺屋企，佢哋都做唔到嗰啲嘢㗎喇。
我：「呀…係喎，要畀錢妳食晏…」
我打開銀包，攞咗兩張五百蚊出嚟畀佢；我都估唔到，原來我可以將咁多錢交畀一個女仔，而又一啲都唔心痛，俾著以前，一千蚊已經夠我做好多好多嘅嘢。
Q：「你…畀家用呀？」
我：「家用…飯錢…乜都好啦，妳要好好生活。」
Q：「多謝你，交叉仔。」




QQ行咗嚟我面前，用力咁攬住咗我，搞到我有啲唔好意思，於是我就輕輕掃佢嘅背。
Q：「傻瓜，我重有錢，聽日都會見到你，如果無錢我自然會問你㗎啦。」
我：「唔緊要啦，琴日出咗糧，畀定妳旁身。」
「卟。」QQ踮高腳，惜咗一下我個嘴仔。
雖然唔係打茄輪，但已經令我好心動。
Q：「嗯，咁我行先喇，聽日再見。」
佢孭住個書包，右手拎住一大袋衫，左手將吉百利放入袋衫嘅上面，然後揮手同我道別。
我：「bye bye…聽日一齊上堂…」
就係咁，右女神離開咗我同佢嘅安樂窩。
唔知…佢心入面有無我呢？應該點都有掛…我又會喺邊一個位置呢？如果我可以有瘟神咁嘅魄力就好，但我何德何能學人哋搶女神喎。




又或者，咁樣同女神生活我已經好滿足，假如完全擁有佢我都唔知後果會變成點。