為了實現媽媽遺願，我成為了女兒國唐僧: 481

Q：「係咁樣咋。」佢嘅聲線異常地平靜。
我：「吓…但係咁樣妳就會暫時唔可以住喺度…」
Q：「好小事啫，同埋已經一早預咗，你…爸爸，佢返嚟幾多日呀？」QQ佢搬返個頭嚟前面認真咁望住我，睇落佢又唔係話好擔心。
我：「兩個禮拜囉，扣埋頭尾即係十三日…」
Q：「都幾長下…不過都正常嘅，始終佢咁耐無返過嚟，點都要放下假兼陪下仔仔嘅。」
我：「對唔住呀…咁長時間，我租唔起酒店畀妳住。」
Q：「傻嘅咩，唔關長短事囉，就算得三四日都唔應該住酒店啦，做乜要嘥埋啲咁嘅錢喎。」
我：「我驚妳…唔開心吖嘛。」
Q：「點會喎，我大部份時間都可以留喺你呢度，重有得包食包住，已經好開心㗎喇，咁我一陣同舅父講，星期日返去佢哋度住一排囉。」
我：「但係…會唔會有問題？」




Q：「會有乜嘢問題喎，本身我就要住喺佢哋屋企嘅，同埋都係兩個禮拜啫，我同佢哋講同學屋企裝修咪得囉，裝修完就返嚟。」
我：「嗯，如果妳無問題嘅話就好。」
Q：「唔使咁擔心喎，不過呢，我都有個壞消息要話畀你聽，雖然我都唔知算唔算壞消息。」
我：「係乜嘢呀？」
Q：「頭先喺學校…瘟神…佢同我表咗白。」
吓…咁突然？！果然…有能力嘅男人係唔會放過任何一個可能性。不過，當初QQ黐埋去嗰陣我都已經估到㗎喇，咁正嘅女仔有邊個可以抗拒到。
我：「咁…妳受歡迎…都唔係壞事嚟嘅…」
唔係囉，係超級壞消息，即係話就算QQ分手，佢都可以即刻轉會去社長度，而我就可以洗洗睡，追求QQ呢條隊，如果我要排都唔知排到去邊，又或者連攞籌嘅資格都唔知有無。
Q：「係嘅，其實都唔關你事，要煩都係我煩啫，如果…從女神嘅角度嚟睇，可能可以叫做好事添。」
我：「但係…妳諗住點，乜佢唔知妳有男朋友㗎咩？」




Q：「佢點會唔知吖，識得咁多人，既然佢對我有興趣，肯定就查過我係乜狀態啦。」
我：「咁佢重喺呢個時候同妳表白？係佢諗住明搶？唔驚俾妳拒絕咩…咁妳畀咗乜嘢答覆佢？」
Q：「佢好叻，無要我畀任何答覆佢。」
我：「即係點？」
Q：「佢只係話，咁難得可以同我兩個人相處，有啲嘢忍唔住好想同我講，佢亦都知我有男朋友…佢唔使我表態，只係話…佢願意等我，亦都可以一直默默咁守護喺我身邊，希望我唔會因為佢而感到唔自在。」
嘩，咁不得了嘅，何等高端嘅溝女技巧…欲擒故縱，以退為進，慾拒還迎？睇嚟，我今次真係連放低個一蚊銀跟機嘅資格都無。