為了實現媽媽遺願，我成為了女兒國唐僧: 480

QQ用雙手撫摸住我塊面，繼續用佢清澈明亮嘅眼珠望住我，就好似我嘅內心已經俾佢睇穿晒咁。
Q：「呀…」
我：「呀？做乜呀？」我完全唔知佢想點…
Q：「你唔係要惜惜咩？唔擘大個口又點惜…」
Q…QQ…妳果然好主動，知道我想點，妳簡直就係一個老江湖！我即刻乖乖聽話照做！
Q：「嚟吖…放條脷喺中間…嗯…同埋人哋怕醜呀…你可唔可以瞇埋隻眼先呀？」
都好，之前每一次惜，差唔多都係佢突然嘴過嚟，完全無準備，而家咁樣反而令我有啲唔知點好…不過我就唔係幾信佢會拍醜囉，拍拖嗰陣嘅佢…應該都會係咁同條仔惜惜㗎啦，唔知佢會點惜呢？究竟係會啜我條脷入去佢個口吖，定係伸條脷入嚟攪動我嘅口腔呢？唔知佢每一下會惜幾耐，會唔會抽乾我哋交接口腔入面嘅空氣呢？
QQ…我嘗試過妳啲口水之後…一定會聽晒妳話。
「卟，卟，卟。」
我呆咗，一秒都唔夠之後我擘返開隻眼，QQ已經鬆手而且行開咗；啱啱佢做咗啲乜？用佢個嘴仔好似啄木鳥咁啄咗我塊面珠墩三下？


我：「Queenie…妳啱啱…」
Q：「做乜呀？唔滿意呀…想投訴？」
我：「妳…唔係諗住咁就算呀…」
Q：「咪惜咗你三下囉，一下都無少到。」
我：「妳所指嘅惜，就只不過係咁樣？」
Q：「唔係你想點呀？玩個陸運會咋嘛…乜你玩得唔開心咩，而且又有牌攞，做乜…咁樣就要我同你打茄輪喎。」
佢講嘅嘢確實係有道理，鼓勵完我玩陸運會之後我的確係幾開心；但站喺我嘅立場…始終都會感到有少少委屈，好似俾佢謴咗咁。
我：「但…但係…」
Q：「你要夾硬嚟咪自己嚟囉，我都講過話唔會反抗，你有份養我，我唔會出聲㗎喎。」
又喺度大我，我真係怕咗佢；於是我行前兩步去到佢面前，左手摟住咗佢嘅肩膊，右手輕輕掃佢嘅髮絲，佢突出嘅心口同我嘅胸口大概只有兩cm嘅距離，不過由於因為佢未換衫，所以PE衫入面係有Bra嘅。


我：「咁到妳擘大口喇。」
佢個樣又無乜不情不願喎，都係精精靈靈咁望住我，而且重有少少鬼馬添，條脷重喺度半吞半吐凌空飄浮，只係喺我個嘴前面五cm到。
我：「欸…妳瞌埋眼啦。」
好吸引…我知道…佢係會服務我，無論佢喺度諗緊乜，都可以好好咁飾演我嘅情人。
但係…唔得，如果我一惜落去，就隨時會做錯事，玩到去唔知邊度，我實在係唔捨得咁樣對一個咁好嘅女仔。
最重要，其實我而家都無乜心情惜惜。
我：「Queenie，我要講個壞消息畀妳聽。」
我緊緊咁攬住佢，將佢嘅上半身擁入懷裡。
Q：「吓…妳…唔係諗住同我講…忍唔住要強姦我呀？」
我：「我…爹地…星期日返香港放假。」