為了實現媽媽遺願，我成為了女兒國唐僧: 469

到咗第二日，QQ又係六點多啲就起身，過咗陣我都跟手起床煮嘢食，今日換一換口味食快熟通心粉，由於我唔使再留肚跑步所以我自己都有一大碗，其餘嘅嘢就同琴日差唔多。
然後QQ食完出門口，過咗陣就到我，今日搭早一班車我哋三個準時去到運動場集合，我又去返看台琴日個位同肥豬細龜一齊坐。
豬：「嚟啦，好快就要同你決勝負喇。」
鬼得閒同佢決勝負，如果係社長就差唔多。
我：「不如下年一齊報三千吖？」
豬：「你吔啦，不如一齊報鐵餅？」
我：「豬跳欄好似都幾有睇頭。」
豬：「不如簡單啲，鬥重，輸咗切。」
我：「有成年畀我增肥，要贏容乜易，不過我無興趣喎，你輸咗咪又係切記做個乖小朋友，為你健康著想，不如鬥輕，輸咗要除褲喺班房入面跑。」
豬：「好串咁喎，不如同學校申請陸運會增加摔角項目，到時睇你敢唔敢上擂台。」




我：「如果係我又唔拘呀，輸咗又唔會話難睇，但如果你爆冷嘅話，我唔知你第二日點返學囉。」
有乜可能呀…睇小說睇上腦，你估香港真係會有格鬥學園咩…重記得小學，好多男仔都好低B，我哋會cosplay one piece或者火影啲角色喺度打，甚至係KOF，街霸，出招前重會大聲嗌All You Get，再一下昇龍拳撞落對方度，不過好似無乜人真係敢用鉤拳打落人哋下巴，呢一下中正其實好大鑊；另外會喺小息一齊係咁摺紙飛鏢，儲埋一大堆再鳴人卡卡西上身，喺槍林彈雨下大部份女仔都會扁晒嘴，不過最後又無乜事，哈！
如果有認真摔角打，我真係未驚過，諗起都幾好玩，我諗我會花幾個月時間嚟練。
男子丙組鉛球得幾丁友報，頂！點解我以前唔知嘅，早知玩下可能隨便就可以攞到牌，佢哋玩完之後就輪到我同肥豬落場，同一時間QQ亦都要準備女乙跳高，另外重有紮起咗個髻嘅Zilvia，佢而家呢個樣…十分之咁奇怪，如果要佢keep住呢個髮型應該會喺女神榜上面跌落嚟。
QQ加油！我真心為妳打氣！
認真咁講啦，推鉛球我真係識條鐵咩，都係一路玩一路睇下人哋個動作嚟修正，肥豬個姿勢叫做有板有眼，收腰背對住發射方向右腳貼邊企，再向後䟴兩步轉半個圈發射，我唔知道呢個動作有乜好，不過實有佢道理嘅，所以就照抄算。