為了實現媽媽遺願，我成為了女兒國唐僧: 461

未到學校個站，成班大帝已經魚貫咁落晒嚟塞住喺個巴士門口，咁我哋唯有等佢哋落晒車先啦。我同阿健跟住佢哋落車，阿康遲一個站落返佢樓下補習；落完車我就目送QQ加埋班圍威喂返學校，阿健亦都行去自己棟樓，咁我…去睇下買啲乜嘢嘢食返屋企先啦。
又唔知QQ要搞幾耐，唔可以買啲要趁熱食嘅嘢，唔通等佢返嚟蒸返熟啲避風塘瀨尿蝦咩，咁同喺棺材摷返醒個人有乜分別…雖然佢上次食嗰隻都係凍，但專登買就費事啦；燒臘本身就成日買，好似無乜特別；理論上我應該可以買兩塊牛扒返屋企自己煎，但好耐無煎過又驚失手，煎到柴皮咁攞畀QQ食同自殺係無乜分別。
係街市行來行去，行到我買咗十蚊煎釀三寶一路行一路咬都未決定到買乜嘢食返去，終於經過一間點心店，都好喎，蒸返就得唔怕會影響質素，於是我就買咗鮮竹卷、雞扎、燒賣同埋豉汁金錢肚；再喺隔籬小食店執咗三十蚊咖哩魚蛋豬皮魷魚蘿蔔，都差唔多，然後就返屋企。
點知…等咗好耐QQ都未返嚟，明明落車嗰陣五點都未夠，但而家已經七點都過埋…乜學校有咁好玩嘅咩？定係佢同其他同學去咗第二度直落繼續癲，例如去唱K？重要著住PE衫…成班喺度猜枚玩大話骰，唔知會唔會有人搵到酒返嚟呢…然後越玩越淫賤，玩到除埋條track褲同扯埋個Bra出嚟…
我知道…呢啲只係我自己多餘兼無謂嘅性幻想，但無論佢做緊乜都好，已足夠令我心緒不靈；一路諗住佢一路玩嘅傳說打到一塌糊塗，就連啲隊友都問候到我媽咪醒返咁滯我都係無反應。
QQ一個message都無send畀我，而我亦都唔敢send message問佢幾時返，我驚佢唔鍾意；結果，我張床上面就只係剩返一個頹喪嘅小朋友喺度發呆。
「咔嚓。」時間啱啱八點。