為了實現媽媽遺願，我成為了女兒國唐僧: 458

B：「阿健，今朝你表現好好，唔該晒你呀。」
佢轉過頭同阿健講嘢，態度截然不同。
健：「多謝，可惜…我追唔到呢條友，如果唔係我叫埋佢一齊跑…」
B：「有乜所謂喎，最緊要玩得開心吖嘛，同friend一齊落場感覺好唔同㗎，雖然下年個社已經唔關我事，都希望睇到你落場啦，同埋…呢條友曳曳仔嚟㗎，你千祈唔好俾佢教壞，唔好話師姐我唔提醒你。」
乜話，我同Carmen你情我願，有幾曳喎…如果我曳一早就日日爬上QQ張床㩒住佢啦。
健：「唉，真係服咗你。」
我：「乜喎，唔好信佢呀，我…真係唔係好曳㗎咋…」至少而家呢刻嚟講我已經乖咗好多。
健：「唔係…我佩服你啫，總有辦法可以令啲女仔變得可愛。」
我：「關乜事呀，我之前咪話佢其實幾nice。」
健：「唔係呀，我指…佢哋平時嗰面都唔係咁，但你嘅亂噏廿四就竟然可以令佢哋變咗個人。」




我：「咁…平時一般人都係正經㗎啦，你同佢哋玩咪可能會唔同樣囉。」
諗返起同Miss隔住道門玩大麻遊戲都覺得自己膽大包天，不過做人成日咁認真唔係會好攰咩。
健：「邊有人好似你咁，係你先做得到。」
我：「可能…純粹係因為佢知我係邊個啫。」
健：「唔係囉，佢應該都係第一次同你講嘢。」
我：「或者你放膽啲，讚佢身材正，可能都有類似嘅效果。」
健：「傻嘅咩，我唔想俾人當做變態佬。」
我：「唔係吖，講事實啫，又唔係叫你非禮佢，係人都鍾意俾人讚㗎啦，如果有個師妹過嚟讚你JJ又大又長，唔通你又覺得佢變態？」
健：「唔係！係覺得你變態啫！同埋我唔係又大又長囉。」
我：「哦，呢啲嘢唔使同我講，其實我無乜興趣知，或者你可以同Kuromi自首，喺佢面前就會變到又長又大又硬，連自己都唔信。」




健：「果然好似社長講咁，唔可以俾你教壞！」
「阿爽！你明明紅社，做乜坐咗過嚟綠社呢邊？！」都就放學啦，啲訓導重咁唔生銹嘅…
我：「啊，我唔記得咗搵人交換衫著先啫。」
「你講乜嘢話？！」我feel到佢想自然咁插個撚字喺中間，不過先生始終係一門專業嚟…
我：「呀！我想講…啱啱我仆…賽道整傷咗，痛得好交關，所以嚟搵我好兄弟幫我專業跌打下。」
我遞高隻腳放喺阿健前面，唔入戲嘅佢勉為其難咁幫我按摩下啲肌肉…
「嘩，搞乜鬼整到咁基，好肉酸呀…」
我：「咁你係咪想我搵啲女同學幫我按摩？我都係唔想你哋難做先出此下策。」
「得喇得喇，唔該你無事之後就過返去紅社。」
咁就走咗，又搞掂一件，都唔明做乜我過咗嚟之後咁多人煩住我。




健：「喂…你唔好累我俾人罰呀。」
我：「咪船頭驚鬼船尾驚賊啦，今日係開心嘅陸運會嚟，就算要罰我都係甘啲嗰個，實有人陪你㗎喎。」
健：「但係我唔想陪你吖嘛！」